Razam z zaprašeńniem z konsulstva pryjści na vybary biełarusy, jakija žyvuć u Polščy, atrymali dakłady absacyjalna-ekanamičnaje stanovišča histaryčnaj radzimy.
U tekście, što pieradała BiełaPAN biełaruskaja siamja, jakaja žyvie ŭ Polščy, havorycca
pra dasiahnieńni krainy, u pryvatnaści, ab tym, što Biełaruś «na praciahu mnohich hadoŭ demanstruje ŭstojlivy ekanamičny rost i značnyja pośpiechi ŭ pavyšeńni ŭzroŭniu dabrabytu ludziej i ich sacyjalnaj abaronienaści».
U tekście apisvajucca dasiahnieńni krainy ŭ baraćbie ź biespracoŭjem, rost pramysłovaha patencyjału, hrašovych dachodaŭ nasielnictva, pavyšeńnie zarpłat i piensij. Adznačajecca taksama, što ŭ Biełaruś pryjazdžaje bolš ludziej, čym jaje pakidaje. Z 2005 hoda mihracyjny pryrost nasielnictva pavialičyŭsia ŭ šeść razoŭ.
«U krainie prykmietna skaraciłasia dola małazabiaśpiečanych ludziej: kolkaść nasielnictva z dachodami nižej za biudžet pražytačnaha minimumu za apošnija piatnaccać hadoŭ paniziłasia ŭ Biełarusi z 38% da 5%žycharoŭ krainy», — adznačajecca ŭ dakładzie.
Pavodle infarmacyi aŭtaraŭ, u halinie achovy zdaroŭja Biełaruś maje samyja vysokija pakazčyki nie tolki siarod krain SND, ale i mnohich inšych dziaržaŭ śvietu.
Z dakłada vynikaje, što Biełaruś apiaredžvaje ŭsie krainy SND i šerah bujnych raźvitych krain, uklučajučy Vialikabrytaniju, ZŠA i Francyju, pa ŭzroŭni pradstaŭnictva žančyn u parłamiencie. Biełaruś pieraŭzychodzić mnohija dziaržavy Jeŭrapiejskaha sajuza pa ŭzroŭni telefanizacyi nasielnictva, a pa kolkaści karystalnikaŭ sietki internet zajmaje pieršaje miesca siarod krain SND.
Anałahičnyja dakłady raźmieščany na sajtach biełaruskich pasolstvaŭ u inšych krainach, u pryvatnaści ŭ Litvie i Estonii.
