U noč na 20 śniežnia z Balnicy chutkaj miedycynskaj dapamohi źnik kandydat u prezidenty, piśmieńnik Uładzimir Niaklajeŭ. Pierad hetym jon byŭ žorstka źbity, kali išoŭ u składzie kałony ad svajho štaba da Kastryčnickaj płoščy. U BCHMD jamu była akazana dapamoha, ale paśla apoŭnačy ŭ pałatu ŭvarvalisia nieviadomyja i źvieźli palityka ŭ nieviadomym kirunku.
Vierahodna, što jon znachodzicca, jak i astatnija 22 zatrymanych, u SIZA KDB. Ale da Niaklajeva nie biaruć pieradačaŭ i nie dapuskajuć advakataŭ.
Na pres-kanfierencyi 20 śniežnia Alaksandr Łukašenka na pytańnie, dzie znachodzicca U.Niaklajeŭ, adkazaŭ tak, što frazu rasstyražavali ŚMI: «Niaŭžo dziejučy prezident nie pavinien viedać, dzie znachodzicca eks-kandydat u prezidenty? Łaskava prosim, chočacie pahavaryć ź im — u śledčy izalatar.
Vy dumajecie, što my jaho vykrali i kudyści pavieźli? Nie, takich padarunkaŭ nie budzie bolš».
Siońnia, a 9-j ranicy žonka paeta, Volha Niaklajeva zaniesła zajavu ŭ KDB i Hienprakuraturu, jana dabivajecca sustrečy z mužam, kab upeŭnicca, što jon žyvy.
Taksama zvarot u Hienprakuraturu pieradali dziejačy kultury, jany taksama patrabujuć abnarodavańnia pra siońniašni stan piśmieńnika
"… Uładzimir Niaklajeŭ byŭ mocna źbity, a potym hvałtam vyviezieny sa špitala. U hramadstvie raspaŭsiudžvacca čutki, što jon pamior. My patrabujem: pakažycie paeta, my chočam viedać, što Ŭładzimir Niaklajeŭ žyvy", — podpisy pad takim zvarotam u Hienprakuraturu Biełarusi pastavili litaratary Uładzimir Arłoŭ, Valancin Akudovič, Siarhiej Zakońnikaŭ, Siarhiej Smatryčenka, Uładzimir Kołas, Aleś Razanaŭ.
