Prapanujem Vašaj uvazie materyjał z aficyjnaha vydańnia Biełaruskaj pravasłaŭnaj carkvy.
«Na praciahu apošnich dzion u redakcyju prychodziać listy našych čytačoŭ, źviazanyja z padziejami 19 śniežnia na płoščy Niezaležnaści ŭ Minsku. U hetych listach — tryvoha i zaniepakojenaść losam źniavolenych, kłopat ab stanie zdaroŭja paciarpiełych, prośby da Mitrapalita Fiłareta ździejśnić misiju miratvorčaści, miłasernaści i jadnańnia ŭ biełaruskim hramadstvie. Sapraŭdy, śviatym abaviazkam Carkvy va ŭsie časy byŭ kłopat pra tych, chto ŭ niavoli, horaściach, pakutach i niastačy. I listy vierujučych — heta śviedčańnie taho, što Carkva nikoli nie zastavałasia ŭ baku ad bied naroda, a malitoŭna padzialała ź im i radaści, i smutak. Uznosiačy malitvy «ab miłaści, spakoi, prabačeńni» usiaho narodu i kožnaha čałavieka, Carkva zaklikaje nas da źjadnańnia dziela miłasernaści i lubovi Božaj, kab stać na šlach miru, dabra i bratalubnaści. Pryvodzim vytrymki ź niekatorych listoŭ.
Vaša Vysokapraaśviaščenstva! Zvažajučy na Vaš aŭtarytet,jak siarod vierujučych Pravasłaŭnaj Carkvy, tak i siarod ludziej inšych kanfiesij i vieravyznańniaŭ, i na toje, što ŭ časie skruchi mienavita ad chryścijan čakajuć najbolšaj mudraści i razvažlivaści, jakija dajucca nam Boham, a ź imi — i navučeńnia, jak vyjści na toj šlach, što nie zaviadzie hramadstva ŭ huščar hrachoŭ i biezzakońnia, a pryviadzie da praŭdy i lubovi, jakoju jość Chrystos.
Prosim Vas zaklikać palityčnych apanientaŭ da miłasernaści, dabryni i čałaviekalubstva, daravańnia pravinaŭ, prosim chadajničać ab vyzvaleńni i spynieńni spraŭ suprać usich źniavolenych, kab śvietłaje śviata Božaha Naradžeńnia jany mahli sustreć doma razam sa svaimi siemjami ŭ radaści dy zhodzie i nie bajalisia dalejšych zatrymańniaŭ abo źniavoleńnia.
Prosim chadajničać za ŭsich zatrymanych studentaŭ i pracoŭnych, kab jany nie byli adličany sa svaich navučalnych ustanoŭ ci pazbaŭleny svaich pracoŭnych miescaŭ, za ŭsich chvorych i źbitych, kab im była akazana naležnaja miedycynskaja dapamoha. Bo tolki tak, prajaviŭšy chryścijanskuju miłasernaść, my zmožam spynić chvalu nianaviści i supraćstajańnia dy adnavić spakoj i bratniuju luboŭ jak u našym hramadstvie, tak i ŭ našych dušach».
Ad imia maładych pravasłaŭnych vierujučych Taćciana Michajłoŭskaja
My, vierniki Respubliki Biełaruś, źviartajemsia da Vasz prośbaj ab malitvie za tych, chto zaraz znachodzicca ŭ turmach, paśla padziej 19 śniežnia 2010 hoda ŭ našaj krainie.
Siarod zatrymanych jość ciažka chvoryja, ludzi stałaha ŭzrostu, žančyny i maładyja ludzi.
Uličvajučy Vaš aŭtarytet, prosim Vas źviarnucca da kiraŭnictva Respubliki Biełaruś, kab u hety śviatočny čas, pamiž Katalickim i Pravasłaŭnym Rastvom, była prajaŭlena miłasernaść, dabrynia i vyzvaleny daterminova ŭsie zatrymanyja.
Kab jany viarnulisia ŭ svaje siemji, da svaich rodnych, kab razam sustreć Božaje Naradžeńnie.
Prosim Vas inicyjavać dyjałoh i vystupić pasiarednikami pamiž kiraŭnictvam krainy i apanientami ŭłady, kab było znojdziena razumnaje i humannaje vyjście z hetaj situacyi, kab mir i supakoj byli na našaj biełaruskaj ziamli.
Siemji Androsik, Areškaŭ, Vajušynych, Koval, Martynienka, Mialhuj, Supranovič
Ad imia pradstaŭnikoŭ biełaruskaj navukovaj i tvorčaj intelihiencyi, pravasłaŭnych vierujučych prosim Vas, darahi Uładyka,źviarnucca da kiraŭnictva našaj krainy z chadajnictvam i prośbaj prajavić miłasernaść da ŭsich ludziej, źniavolenych u suviazi z šeściem ad Kastryčnickaj płoščy da płoščy Niezaležnaści
U śviatyja dni Raždžestvienskaha postu ŭvieś chryścijanski śviet ščodra prajaŭlaje luboŭ Chrystovu i ździajśniaje spravy ŭzajemaprabačeńnia i miłasernaści da bližnich. U hetyja dni śviatym abaviazkam Carkvy źjaŭlajecca zaklik da jednaści, hramadzianskaha miru i miłasernaści, jakija tolki i zdolny pieraadoleć raźmiežavańni i prynieści sapraŭdny mir i spakoj u našy siemji i hramadstva.
Narod Božy štodzień molicca ŭ chramach «za krainu našu, ułady i voinstva jaje», a tamu Carkva maje prava prasić ułady prysłuchacca da našaha hołasu jak častki naroda, kab ździejśnić spravu miłasernaści i vyzvalić źniavolenych z zaklučeńnia, bo jany nie ŭjaŭlajuć saboju pahrozy dla inšych ludziej. Taki žest dobraj voli z boku ŭłady paspryjaje ŭstalavańniu ŭzajemadavieru, uzajemaadkaznaści i ŭzajemadziejańnia dziaržavy z roznymi słajami hramadstva. Što pryviadzie da ŭzajemarazumieńnia, salidarnaści i pošuku šlachoŭ raźvićcia našaj Baćkaŭščyny.
Takija dziejańni majuć asablivaje značeńnie ciapier, napiaredadni Raždžastva Chrystovaha, pierad abliččam Bohadziciatki Chrysta, Jaki prychodzić u śviet i jaŭlaje miłaść Svaju da ŭsich: dabradziejnych i hrešnych, tych, chto praviedny i chto pamylajecca. I kali ŭ hetyja śviatyja dni my zdolejem uźniacca nad palityčnymi i idejnymi padziełami i źjadnać svaje sercy dziela miłaści i lubovi Božaj, to možam spadziavacca, što Haspodź dapamoža narodu našamu pieraadoleć spakusy i ciažkaści, kab stać na bohaŭhodny šlach miru, dabra i bratalubnaści.
Staršynia Bractva ŭ honar Vilenskich mučanikaŭ
Mikałaj Matrunčyk
Na našaj ziamli vialikaje hora, bolšaje, čym pažary i navadnieńni ŭ inšych krainach. Bolš za 600 čałaviek apynulisia ŭ turmie,siarod ich chryścijanie, prychadžanie našych chramaŭ. Pakutujuć ich dzieci i baćki. Našaha spačuvańnia i našych słabych malitvaŭ tut niedastatkova.
Z historyi Carkvy my viedajem, što ŭmieńniem sunimać sprečki i prypyniać zvady słaviłasia śviataja Jeŭfrasińnia Połackaja. Prapadobny Fieadosij Piačerski vykryvaŭ hrachi miranaŭ i pavučaŭ kniazioŭ, zastupaŭsia ŭ sudzie za pakryŭdžanuju ŭdavu, vaziŭ chleb viaźniam u astroh, budavaŭ dom dla biazrodnych. Śviaty Sierhij Radaniežski prajšoŭ pieški 200 viorst dziela sustrečy z kniaziem Aleham Branskim, paśla jakoj kniaź, pieramianiŭšy lutaść na łahodnaść, pamiryŭsia ź Dzimitryjem Danskim.
Vaša Vysokapraaśviaščenstva, my prosim Vašych śviatych malitvaŭ za paciarpiełych i źniavolenych, a taksama Vašaha chadajnictva pierad uładami ab prajaŭleńni miłasernaści adnosna źniavolenych dziela ŭstalavańnia miru i spakoju na ziamli našaj».
Hanna Doraš, prychadžanka
