«Naša Niva» vyśvietliła, dzie možna pakatacca cyvilizavana. Łyžnych kurortaŭ u Biełarusi dva: Siličy i Łahojsk. Siudy jeduć nie tolki biełarusy, ale i žychary susiednich krain.
Harnałyžny kurort u Siličach.
Siličy
Siličy — miesca, adrazu skažam, darahoje. Naprykład, dvuchmiascovy numar u miascovym hateli kaštuje 242 tysiačy za dzień. Kali paraŭnać, heta tydniovy zarobak nastaŭnika.
Ale, naprykład, čatyrochmiascovy numar (na siamju) za dzień abydziecca tańniej: 352 tysiačy.
Nie nadta adroźnivajecca i košt za katedž — vybar na hust hościa. U luby z koštaŭ uvachodzić śniadanak u lubimaj usimi formie — šviedski stoł. Možna ŭziać i «poŭny pansijon», ale cana tady vyraście prykładna na 50%.
Azdaraŭlalny tur na tydzień paciahnie na 1 400 000 rubloŭ.
Što tyčycca niepasredna łyžaŭ, to padjom na kanatnaj darozie budzie kaštavać niedzie piać tysiač, a abaniemient na dzień — 50 tysiač, kali dzień nie vychodny (u vychodny — 65).
Koŭzańnie na «navučalnaj» trasie kaštuje 10 tysiač za hadzinu ci 40 tysiač za ŭvieś dzień. Što treba adznačyć, dyk heta «načnyja taryfy» — jany nižejšyja za dzionnyja razy ŭ dva.
Toje samaje tyčycca i prakatu astatniaha: dniom łyžy buduć kaštavać 6 tysiač za hadzinu ci 20 000 za ŭvieś dzień (u vychodnyja — 9000 i 25 000), łyžnyja čaraviki — u toj ža košt, a pałki — 10 000 za dzień.
Arhanizavać sabie «dzień łyžnika» ŭ Siličach možna, a voś pryjechać tudy na tydzień zdoleje nie kožny.
Łahojsk
«Łahojsk» zaŭždy ličyŭsia tańniejšym za Siličy. Numar u miascovym hateli kaštuje 150 tysiač za dzień, što značna mienš za Siličy. A jašče ŭ Łahojsku isnujuć jeŭrapiejskaha typu damki-šale, jakija kaštujuć troški daražej za hatel. Papularnaść u ich vialikaja. U siarednim kaštuje taki domik 500 000 u vychodny dzień.
Košt łyžaŭ i astatniaha ryštunku amal taki samy, chacia roźnica ŭ try-čatyry tysiačy na karyść Łahojska jość.
Zakapanaje
Kali pahladzieć na košt harnałyžnych kurortaŭ Polščy, vyśviatlajecca, što źjeździć na «łyžny» adpačynak u susiedniuju krainu budzie ledźvie nie tańniej, čym adpačyć u Biełarusi.
Naprykład, dzieviać dzion u Zakapanym razam z ekskursijami, hatelem, tranśfieram i śniadankam kaštuje kala 340 jeŭra. Pa canie mała roźnicca ad poŭnaha pansijona ŭ Siličach. Adnak za prajezd ciahnikom da Varšavy daviadziecca dapłacić, dyj usialakaja drabiaza kštałtu padjomnika budzie daražejšaj.
Arandavać łyžy z usim kamplektam nieabchodnaha na dzień u Zakapanym kaštuje 5 jeŭra. A kali brać na niekalki dzion — atrymlivajecca źnižka na 30 pracentaŭ.
Birštonas
U Litvie na takim kurorcie, jak Birštonas, dzień u hateli (ad troch da čatyroch zorak) abychodzicca minimum u 35 jeŭra, što tańniej, čym u Biełarusi. U hetaj prapanovie taksama ŭklučana amal usio, akramia ŭłasna łyžaŭ, pry hetym arenda taksama budzie ŭ miežach tych ža piaci jeŭra, što i ŭ Siličach.