Alaksandra Kyźniacova, kiraŭnika viciebskaj supołki «Moładzi BNF», a ŭ časie vybarčaj kampanii — davieranuju asobu Ryhora Kastusiova, hvałtam zaciahnuli ŭ słužbovuju mašynu. Pra heta raspaviała znajomaja aktyvista, na vačoch u jakoj usio adbyłosia.
Dziaŭčyna, jakaja nazvałasia Marynaj, skazała pa telefonie, što nieviadomyja asoby vyciahnuli Alaksandra Kuźniacova ź jahonaj mašyny, pavalili na śnieh, a potym zaciahnuli ŭ inšuju mašynu. Heta adbyłosia kala 10-j ranicy.
Blizka paŭdnia aktyvist užo byŭ dastupny pa mabilnym telefonie i raspavioŭ pra niekatoryja akaličnaści zdareńnia. Jak vyśvietliłasia, supracoŭniki KDB, jakija abrali taki sposab zatrymańnia, zavieźli jaho ŭ abłasnuju ŭpravu i dapytali pra padziei 19 śniežnia ŭ Miensku.
Alaksandar Kuźniacoŭ daŭ padpisku pra nierazhałošvańnie tajamnicy śledztva, i tamu padrabiaznaściaŭ dopytu nie raspaviadaŭ. Zaznačyŭ tolki, što na padstavie artykuła 27 Kanstytucyi jon admoviŭsia śviedčyć suprać siabie, i prosta nie adkazvaŭ na mnohija pytańni.
Aktyvist zhadaŭ taksama, što kala tydnia tamu jamu patelefanavali ź Pieršamajskaha rajadździeły milicyi i zaprasili na razmovu pra mienskuju akcyju 19 śniežnia. Ale Alaksandar Kuźniacoŭ admoviŭsia iści, pakul nie dašluć aficyjnuju pozvu. Pozvy jon tak i nie atrymaŭ.
