Lidar praŭładnaha Sajuza palakaŭ abiacaje «adstojvać niezaležnaść našaj Radzimy».
Fota BiełTA
«Siońnia kiraŭniki niekatorych dziaržaŭ abmiarkoŭvajuć pytańnie ab pryznańni ci nie pryznańni vybaraŭ prezidenta Biełarusi pravamocnymi. Dziakuj vialiki za kłopat ab demakratyi ŭ našaj krainie. Škada, što zabylisia samuju drabnicu — spytać samich hramadzian Biełarusi, ci žadajuć jany “aščaślivicca” pa ich receptach?» — lidar praŭładnaha sajuza palakaŭ Stanisłaŭ Siamaška adreahavaŭ na sankcyi Zachadu suprać uładaŭ Biełarusi.
Svoj zvarot jon padrychtavaŭ pa-rasiejsku, Biełaruś u im nazyvaje Biełoruśsijej.Stanisłaŭ Siamaška nahadvaje pra zabaronu na ŭjezd u Polšču dla šerahu siabroŭ jahonaha sajuza. I nazyvaje heta «paskudnieńkimi represijami» za toje, što tyja, kamu zabaranili naviedvać Polšču, «nie zdradzili Radzimie i nie padparadkavalisia apazicyjanieram», z čyjoj podłaj padačy dziejničaje polski kansułat.
«A kali b chtości z «demakrataŭ» pieramoh? Što b ich čakała? Turmy? Ci štości horšaje? Dziakuj, nam hetaha nie treba! Nas nie zapałochali fašysty i vam nas nie zapałochać! Plavać nam na vašyja paskudnieńkija represii».
Siamaška abiacaje i «dalej nieści ŭ narod polskuju movu, historyju, kulturu, dapamahać Alaksandru Ryhoraviču Łukašenku adstojvać niezaležnaść našaj Radzimy i pracavać dla jaje roskvitu». Jon aficyjna zajaŭlaje , što nichto nie prymušaŭ biełaruskich palakaŭ hałasavać za Łukašenku.
«Nichto nie abiacaŭ adździačyć za pravilnaje hałasavańnie da vybaraŭ, nichto nie padziakavaŭ za padtrymku paśla vybaraŭ i my nie čakajem, jak apazicyjaniery, miljonaŭ dalaraŭ u vyhladzie padziaki za toje, što my vykazvajem svaju aficyjnuju padtrymku A.R.Łukašenku zaraz».Dalej Siamaška ad imia svajho sajuza «aficyjna i nastojliva patrabuje, kab urady inšych dziaržaŭ pierastali biespardonna ŭmiešvacca ŭ našy ŭnutranyja spravy i asprečvać naš palityčny vybar».
Naprykancy zvarotu lidar praŭładnaha Sajuza palakaŭ pryhraziŭ:
«Ci vy ličycie, što Vy macniejšyja i bahaciejšyja i tamu možacie dazvolić sabie źnievažać nas svaimi niepryznańniami. Viedajecie, demanstracyi mohuć być nie tolki suprać, ale i ŭ abaronu abranaha Prezidenta!My chočam z usimi siabravać, ale nie dazvolim saboju pamykać».
