Parłamienckaja asambleja Rady Jeŭropy na siesii ŭ Strasburhu zaklikała aficyjny Minsk vyzvalić usich palitźniavolenych i pravieści abjektyŭnaje rasśledavańnie padziej u biełaruskaj stalicy 19 śniežnia 2010 hoda. Pra heta havorycca ŭ rezalucyi, pryniataj 27 studzienia pavodle vynikaŭ terminovych debataŭ ab situacyi ŭ Biełarusi.Za rezalucyju prahałasavała 90 deputataŭ, suprać — 9, ustrymalisia — 3.
PARIE asudžaje zatrymańni i aryšty mirnych demanstrantaŭ i kandydataŭ u prezidenty, lidaraŭ demakratyčnaj apazicyi, vialikaj kolkaści hramadzianskich aktyvistaŭ, žurnalistaŭ, nastaŭnikaŭ i studentaŭ. PARIE patrabuje nieadkładnaha ich vyzvaleńnia i spynieńnia palityčna matyvavanych represij.
Akramia taho, asambleja patrabuje spynić vyklučeńnie studentaŭ z VNU i zvalnieńnie ludziej z pracy
PARIE zaklikaje biełaruskija ŭłady pierahledzieć rašeńnie ab zakryćci ofisa ABSIE ŭ Minsku i pradoŭžyć jaho mandat na 2011 hod i dalej, a taksama zaviaršyć reformu vybarčaha zakanadaŭstva i jaho praktyčnaha prymianieńnia, pryniaŭšy da ŭvahi rekamiendacyi BDIPČ ABSE i Vieniecyjanskaj kamisii.
U rezalucyi ŭtrymlivajecca taksama zaklik da ŭsich krain — členaŭ Rady Jeŭropy «padtrymlivać i ŭzmacniać dyjałoh ź biełaruskaj hramadzianskaj supolnaściu i kantakty pamiž ludźmi na ŭsich uzroŭniach, razhledzieć mahčymaść spraščeńnia vizavaha režymu dla prostych hramadzian; natchnić univiersitety na adkryćcio svaich dźviarej dla biełaruskich studentaŭ, vyklučanych za palityčnuju dziejnaść».
PARIE zaklikaje biełaruskija ŭłady praciahnuć rasśledavańnie źniknieńniaŭ Juryja Zacharanki, Dźmitryja Zavadskaha, Anatola Krasoŭskaha i Viktara Hančara, a taksama ŭvieści maratoryj na śmiarotnuju karu ŭ jakaści pieršaha kroku da jaje poŭnaj admieny.
U rezalucyi adznačajecca, što lubyja sankcyi i abmiežavańnie kantaktaŭ z aficyjnymi asobami, jakija adkaznyja za toje, što adbyłosia, nie pavinny pryvieści da izalacyi biełaruskaha naroda.
«Asambleja taksama pierakanana ŭ nieabchodnaści prymianieńnia razumnych sankcyj u dačynieńni da tych, chto adkazny za najbolš aburalnyja akty represij. U suviazi z hetym PARIE zaklikaje ŭsie krainy — členy Rady Jeŭropy, uklučajučy tyja, jakija nie ŭvachodziać u Jeŭrasajuz, dałučycca da sankcyj ES u dačynieńni da biełaruskich aficyjnych asob», — havorycca ŭ rezalucyi.
PARIE maje namier pašyryć dyjałoh z demakratyčnymi siłami, hramadzianskaj supolnaściu, niezaležnymi ŚMI i pravaabaroncami ŭ Biełarusi i zaklikaje da hetaha ŭsie krainy — členy Rady Jeŭropy. Asambleja zaklikaje palityčnyja partyi Jeŭropy akazvać padtrymku «braterskim» partyjam u Biełarusi, u tym liku finansavuju.
PARIE zaklikaje razhledzieć mahčymaść davańnia časovaha prystanku palityčnym apanientam režymu, pravaabaroncam i žurnalistam, jakim pahražajuć u Biełarusi.
