Sudździa Čyhunačnaha rajsudu Alena Cyhankova apraŭdała apazycyjanera, jakoha 3-ha studzienia milicyjanty zatrymali ŭ centry Viciebsku ź bieł-čyrvona-biełym ściaham.
Sudovy praces nad Barysam Chamajdam, na jakoha ŭ pastarunku skłali pratakoł za niesankcyjanavanaje pikietavańnie, raściahnuŭsia na ceły miesiac. Adrazu paśla zatrymańnia 3-ha studzienia sudździa Alena Cyhankova admoviłasia raźbirać spravu apazycyjanera i adpraviła składzieny milicyjantami pratakoł na dapracoŭku. Bo jany nie paznačyli, što za parušeńnie paradku praviadzieńnia masavych mierapryjemstvaŭ jon byŭ zatrymany ŭžo nie ŭpieršyniu.
25-ha studzienia Barys Chamajda byŭ znoŭ vyklikany ŭ Čyhunačny rajsud. Jon niekalki razoŭ zajaŭlaŭ advod sudździ, jakaja schilałasia da taho, što dziejańni apazycyjanera niezakonnyja. Urešcie spadar Chamajda ŭvohule admoviŭsia davać pakazańni, i Alena Cyhankova zajaviła, što ŭ takim razie vymušana hruntavacca tolki na pakazańniach śviedkaŭ — milicyjantaŭ, jakija pravodzili zatrymańni.
Ale 4-ha studzienia, pavodle słoŭ samoha Barysa Chamajdy, «adbyłasia histaryčnaja padzieja». Choć supracoŭniki milicyi nastojvali, nibyta apazycyjaner pravodziŭ 3-ha studzienia niesankcyjanavany pikiet, sudździa pastanaviła skasavać sudovuju spravu praz adsutnaść składu pravaparušeńnia.
Pavodle Barysa Chamajdy, hetaje sudovaje rašeńnie jon usprymaje jak dazvoł i nadalej vychodzić ź bieł-čyrvona-biełym ściaham da tak zvanaha «siniaha doma» — doma № 28 pa vulicy Lenina, dzie jon raspaŭsiudžvaje niezaležnuju presu. U dzień, kali jaho zatrymali, apazycyjaner jakraz abviaściŭ biesterminovuju akcyju «2011 hod — hod nacyjanalnaha ściaha», pryśviečanuju 20-hodździu biełaruskaj niezaležnaści.
U nastupny paniadziełak, 7-ha lutaha, Barys Chamajda planuje praciahvać akcyju — znoŭ razharnuć bieł-čyrvona-bieły ściah u centry Viciebsku.
Radyjo Svaboda
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH
