Respublikanskaja Dziaržaŭtainśpiekcyja abjaviła ab uzmacnieńni kantrolu za vykarystańniem ramianioŭ biaśpieki kiroŭcami i pasažyrami, a taksama za vykanańniem kiroŭcami praviłaŭ karystańnia radyjo- i telefonnaj suviaźziu padčas ruchu.
Ab hetym paviedamili va ŭpraŭleńni DAI MUS Biełarusi.
U Dziaržaŭtainśpiekcyi adznačajuć, što dziejańnie remienia nakiravana na źmiakčeńnie nastupstvaŭ DTZ, asabliva ciažkaści traŭm, što atrymlivajuć kiroŭca i pasažyry. Remień biaśpieki, pieratvarajučy vadziciela ŭ adzinaje cełaje z sałonam aŭtamabila, zaścierahaje jaho ad udaru abo ad niebiaśpieki być vykinutym praź dźviery albo vietravoje škło.
Mnohija krainy daśledavali efiektyŭnaść vykarystańnia ramianioŭ biaśpieki. Zhodna sa źviestkami Vyšejšaha instytuta achovy zdaroŭja Italii, ich prymianieńnie sadziejničała skaračeńniu kolkaści DTZ ź ciažkimi traŭmami i śmiarotnym zychodam na 60–80%, a ź mienš ciažkimi — na 40–60%. Francuzskija śpiecyjalisty ŭ halinie pasiŭnaj biaśpieki aŭtamabila ŭstanavili, što ŭ vypadku frantalnaha sutyknieńnia prymianieńnie ramianioŭ biaśpieki ŭ dzieviać razoŭ źnižaje vierahodnaść atrymańnia ciažkich abo śmiarotnych ranieńniaŭ hałavy ŭ pasažyraŭ, jakija znachodziacca na piarednich siadzieńniach.
Dziaržaŭtainśpiekcyja Biełarusi nastojliva rekamienduje nie pahardžać ramianiami biaśpieki,
a kiroŭcam, jakija pieravoziać małaletnich dziaciej, ustanavić u sałonach aŭtamabilaŭ śpiecyjalnyja dziciačyja fateli.
DAI nahadvaje, što za nie pryšpileny remień biaśpieki kiroŭcu mohuć papiaredzić abo pakarać štrafam da adnoj bazavaj vieličyni (35 tysiač rubloŭ). Paŭtornaje takoje parušeńnie na praciahu hoda paciahnie pavieličeńnie adkaznaści — štraf ad dźviuch da piaci bazavych vieličyń.
Štraf za parušeńnie praviłaŭ karystańnia radyjo- i telefonnaj suviaźziu padčas ruchu moža skłaści da dźviuch bazavych vieličyń, paŭtorna na praciahu hoda — ad dźviuch da vaśmi bazavych vieličyń.
