18 lutaha adbudziecca razhlad spravy vydańnia «Znamia Junosti» suprać byłoha karespandenta pa Bieraści Alesia Leŭčuka. Papiarednija słuchańni prajšli 26 studzienia ŭ sudzie Maskoŭskaha rajonu Bieraścia.
Padčas sudovaha pasiedžańnia ad vydańnia «Znamia Junosti» ŭ sudzie buduć prysutničać juryst hazety i dźvie žurnalistki hazety.
Aficyjnaja pradstaŭnica vydańnia, namieśnica hałoŭnaha redaktara hazety «Znamia Junosti» Iryna Słabodzič, admaŭlajecca ad kamentaroŭ:
«Ja nia budu kamentavać akaličnaści spravy, naša pozva znachodzicca ŭ sudzie Maskoŭskaha rajonu Bieraścia. Usie našyja pretenzii buduć ahučanyja padčas sudovaha pasiedžańnia i ŭsie kamentary buduć paźniej. Usie budzie ŭ miežach zakonu. Davajcie dačakajemsia taho, što vyrašyć sud».
«Znamia Junosti» prapanavała karespandentu ź Bieraścia Alesiu Leŭčuku zvolnicca pa asabistym žadańni. U svaim błohu i ŭ interviju Radyjo Svaboda Aleś Laŭčuk adznačyŭ, što pryčyny zvalnieńnia palityčna matyvavanyja. Žurnalist adznačyŭ, što redakcyja patrabavała ad jaho napisać nehatyŭnyja materyjały pra apazycyju i padziei na Płoščy.
U svaju čarhu «Znamia Junosti» paličyła, što dopisy Leŭčuka nanieśli stratu dziełavoj reputacyi hazecie i patrabuje abvierhnuć hetuju infarmacyju za košt Alesia Laŭčuka.
Akramia hetaha redakcyja damahałasia, kab suprać Leŭčuka zaviali kryminalnuju spravu za nibyta paklop.
Milicyja admoviłasia zavodzić kryminalnaj spravy, kaža Aleś Laŭčuk:
«Hazeta „Znamia Junosti“ źviarnułasia ŭ milicyju z zajavaj ab uzbudžeńni kryminalnaj spravy ŭ adnosinach da mianie. Ale hety zvarot nia byŭ padtrymany. Milicyja admoviła vydańniu. Padstavaŭ dla zaviadzieńnia kryminalnaj spravy nie było. Uvohule, padčas papiaredniaha pasiedžańnia ŭ sudzie pradstaŭniki vydańnia adznačyli, što ja kiepska pracavaŭ. Jany śviedčyli, što najmajučy mianie na pracu, viedali pra maje palityčnyja pohlady, ich heta nie cikaviła».
Aleś Laŭčuk adznačaje, što žurnalisty ź Bieraścia, siabry Biełaruskaj asacyjacyi žurnalistaŭ padtrymali jaho, prajavili salidarnaść:
«Žurnalisty prajavili sapraŭdnuju salidarnaść, padtrymali mianie. Viedaju, što mnohija pryjduć na sudovaje pasiedžańnie».
Razhladacca sprava budzie ŭ sudzie Maskoŭskaha rajonu Bieraścia.
