25 listapada siabry i pryjacieli Zhurtavańnia Biełarusaŭ Vialikaj Brytanii sabralisia ŭ Biełaruskim hramadzka-relihijnym centry ŭ paŭnočnym Londanie na štohadovuju akademiju ŭšanavańnia pamiaci vajaroŭ Słuckaha zbrojnaha čynu.
Adznačeńnie ŭhodkaŭ hieraičnaha zmahańnia słuččakoŭ za niezaležnaść BNRi raspačałosia carkoŭnaj słužbaj za zahinuŭšych za Baćkaŭščynu, što adpraŭlaŭ u carkvie śv. Piatra i Paŭła apostalski vizytatar dla biełarusaŭ-katalikoŭ zamiežža a. Alaksandar Nadsan.
U zali centru prysutnych pryvitała staršynia ZBVB Lola Michaluk. Byŭ začytany zvarot Staršyni Rady BNR sp-i Ivonki Surviłły z nahody słuckich uhodkaŭ, a taksama referat na temu dnia namieśnika staršyni ZBVB Mikoły Pačkajeva.
Sp. Pavał Šaŭcoŭ pradeklamavaŭ niekalki vieršaŭ Natalli Arsieńnievaj, pryśviečanych pamiaci zmaharoŭ za Biełaruś, a sp. Siaržuk Vinahradaŭ vykanaŭ biełaruskija narodnyja pieśni ŭ supravadžeńni dudy. Aficyjnaja častka akademii zaviaršyłasia śpievam nacyjanalnaha himnu «My vyjdziem ščylnymi radami».
Druhuju častku schodu ZBVB pryśviaciła ajciec A. Nadsanu z nahody 80-ha jubileju jaho žyćcia. Ajciec A. Nadsan – adzin z najbolš vybitnych relihijnych i hramadzkich dziejačoŭ pavajennaj biełaruskaj emihracyi, jaki byŭ taksama siarod zasnavalnikaŭ Zhurtavańnia Biełarusaŭ Vialikaj Brytanii u 1946 h. i da ciapier znachodzicca jaho čynnym siabram. Ad siabroŭ ZBVB jamu byŭ uručany padarunak.