Vice-ministr zamiežnych spraŭ Litvy Evałdas Ihnatavičus 14 sakavika ŭ Vilni ŭručyŭ biełaruskamu pasłu Uładzimiru Dražynu notu pratestu. Heta było zroblena ŭ suviazi z zajavami biełaruskich słužbovych asob ab tym, što spravazdača ab mahčymym ŭździejańni na navakolnaje asiarodździe zapłanavanaj biełaruskaj AES nibyta nie vyklikała pretenzij u litoŭskaha boku.
«Biełaruś nie zaviaršyła pracu pa acency ŭździejańnia na navakolnaje asiarodździe zapłanavanaha prajekta budaŭnictva AES u adpaviednaści z ahulnapryniatymi mižnarodnymi pravavymi normami, nie arhanizavała hramadskija słuchańni ŭ Litvie i dvuchbakovyja kansultacyi, jak taho patrabuje mižnarodnaja Kanviencyja Espo», — havorycca ŭ dakumiencie, raźmieščanym na sajcie MZS Litvy.
2 sakavika ŭ Minsku namieśnik ministra enierhietyki Biełarusi Michaił Michadziuk paviedamiŭ žurnalistam, što aficyjny Minsk «zaviaršyŭ abmierkavańnie spravazdačy ab acency ŭździejańnia na navakolnaje asiarodździe ź Litvoj».
3 sakavika MZS Litvy zajaviła, što zaniepakojenaje «infarmacyjaj, jakaja ŭvodzić u zman, nibyta Litva nie piarečyć spravazdačy ab uździejańni na navakolnaje asiarodździe zapłanavanaj biełaruskaj atamnaj elektrastancyi».
Pavodle padpisanaj u 1991 hodzie Kanviencyi AAN ab acency ŭździejańnia na navakolnaje asiarodździe ŭ transhraničnym kantekście (Kanviencyja Espo), pry płanavańni dziejnaści, jakaja moža akazać niehatyŭny transhraničny efiekt, krainy pavinny pravodzić acenku ŭździejańnia na navakolnaje asiarodździe.