Haładoŭka haradzienskich katalikoŭ
1 śniežnia vierniki haradzienskaj parafii Najśviaciejšaj Panny Maryi, Maci miłasernaści raspačali post-haładoŭku. Jany damahajucca, kab haradzkija ŭłady dali piśmovy dazvoł na pabudovu chramu, jakoha parafijanie nia mohuć atrymać dziesiać hadoŭ. U haładoŭcy razam z a.Alaksandram Šemietam biaruć udzieł kala dvuch dziasiatkaŭ čałaviek. Na treci dzień haładoŭnikaŭ naviedaŭ biskup haradzienskaj dyjacezii Alaksandar Kaškievič i vykazaŭ padtrymku haładoŭnikam. Haradziencaŭ padtrymali vierniki mienskaj pratestanckaj carkvy «Novaje žyćcio», a taksama pradstaŭniki apalnaha Sajuzu palakaŭ u Biełarusi. Dźvie stałyja žančyny vymušanyja byli praz paharšeńnie stanu zdaroŭsia spynić haładoŭku.
5 śniežnia čynoŭniki haradzienskaha harvykankamu sustrelisia z haładoŭnikami. Jany pryvieźli papieru za podpisam pieršaha namieśnika harvykankamu Kunaša, jakaja śviedčyć, što haradzienskija ŭłady nia suprać pabudovy kaściołu na terytoryi, dzie siońnia mieścicca kaplica parafii. Vierniki admovilisia ad pieramovaŭ. Jany buduć ličyć zadavolenymi svaje patrabavańni tolki kali atrymajuć zaćvierdžany ŭładami plan pabudovy kaściołu.
6 śniežnia haładoŭka była spyniena
Uhodki Słuckaha zbrojnaha čynu
3 śniežnia aktyvisty Partyi BNF i moładź BNF zładzili prymierkavanuju da ŭhodkaŭ Słuckaha paŭstańnia vandroŭku na Słuččynu. U časie pajezdki jaje ŭdzielniki vosiem razoŭ sustrakalisia z pradstaŭnikami pravaachoŭnych orhanaŭ. Padčas razdačy drukavanych materyjałaŭ byli zatrymanyja miascovyja aktyvisty Pavał Filipienia i Vital Amialkovič, jakich nieŭzabavie adpuścili biez składańnia pratakołaŭ, na mienčuka Mikołu Jakušava skłali pratakoł ab raspaŭsiudzie niezarehistravanaj drukavanaj pradukcyi i adpuścili. Pierad vyjezdam sa Słucku milicyjanty, u prysutnaści čałavieka ŭ cyvilnym, zapisali pašpartnyja źviestki ŭdzielnikaŭ vandroŭki. Ciaham dnia milicyja supravadžała aŭtobus, «pieradajučy» jaho z rajonu ŭ rajon.
U Barysavie moładzievyja aktyvisty taksama adznačyli hadavinu Słuckaha zbrojnaha čynu. Da kryža, ustalavanaha ŭ pamiać achviaraŭ stalinskich represijaŭ, pryjšło niekalki dziasiatkaŭ aktyvistaŭ kampanii "Za svabodu". Napiaredadni moładzievyja aktyvisty raspaŭsiudzili ŭ horadzie tysiačy nalepak «Džyns – za svabodu!»
29 listapada
Adličanyja Alaksandar Stračuk i Dzianis Sarokin, studenty ahraekalahičnaha fakultetu Horackaj akademii. A.Stračuk balatujecca ŭ Horacki harsaviet, a Dz.Sarokin – siabra jahonaj inicyjatyŭnaj hrupy. Administracyja akademii nie aznajomiła studentaŭ z vymovami, tolki painfarmavała.
Były deputat pałaty pradstaŭnikoŭ Hienadź Dyleŭski asudžany na 5 hadoŭ turmy za «padbuchtorvańnie da dačy chabaru ŭ pamiery 75 tysiač dalaraŭ». H.Dyleŭski da aryštu pracavaŭ dyrektaram «Biełaruskaha marskoha parachodztva», a ŭ pałacie pradstaŭnikoŭ byŭ siabram deputackaj hrupy «Respublika», jak i Siarhiej Skrabiec, što tolki niadaŭna vyjšaŭ z turmy.
130 pracaŭnikoŭ AT «Dobruskaja papiarovaja fabryka «Hieroj pracy» napisali zajavy ab vychadzie z aficyjnaha prafsajuzu. Pryčyna – niezadavolenaść nizkimi zarobkami i ciažkimi ŭmovami pracy. Pracaŭniki kažuć, što prafsajuz ničoha nia robić dziela palapšeńnia sytuacyi.
Ranicaj 29 listapada na homielskim zavodzie puskavych ruchavikoŭ učastkovym byŭ składzieny pratakoł na hramadzkaha aktyvista i pravaabaroncu Anatola Papłaŭnaha za parušeńnie art.172 KoaP (raspaŭsiud drukavanych vydańniaŭ, źmiest jakich skiravany na naniasieńnie škody dziaržaŭnamu i hramadzkamu paradku). Artykuł praduhledžvaje štraf da 5 min. zarobkaŭ i kanfiskacyju drukavanych materyjałaŭ.
30 listapada
Pastara carkvy «Błahodať Iisusa» z Krupak Mikałaja Baryčeŭskaha treci raz na praciahu hodu naviedali pradstaŭniki ŭłady. Sp.Baryčeŭskaha zabrali z domu i advieźli jaho ŭ RUUS, dzie skłali pratakoł za pražyvańnie ŭ Krupkach biez prapiski. Pa słovach pastara, jamu pahražali likvidacyjaj supołki, kali jon nia spynić krytyčnych vykazvańniaŭ na adras dziejučaj ułady.
Uviečary na aŭtavakzale ŭ Mahilovie była zatrymanaja aktyvistka AHP Kryścina Šacikava. Jaje pratrymali ŭ milicyi kala dvuch hadzin i skłali pratakoł kanfiskacyi drukavanaj pradukcyi i ŭručyli pazoŭ źjavicca o Leninski RUUS Mahilova dla dačy pakazanmniaŭ.
U Miensku zatrymany moładzievy aktyvist Siaržuk Huminski. Uvahu milicyjantaŭ pryciahnuła značak "Pahonia" na vopratcy aktyvista. Cupracoŭniki milicyi advieźli moładzievaha aktyvista ŭ Leniniski RUUS stalicy, dzie na jaho byli składzienyja pratakoły za "drobnaje chulihanstva" i "raspaŭsiud drukavanych materyjałaŭ biez vychodnych dadzienych".
Alaksandra Milinkieviča ŭviečary zatrymali ŭ aeraporcie «Miensk-2», kali jon viartaŭsia z Ryskaha samitu NATO. Jaho abvinavačvajuć u «naŭmysnym pierasiačeńni miažy pa niesapraŭdnych dakumentach». Za heta pahražaje dva miesiacy papraŭčych rabotaŭ. A ŭsia sprava ŭ tym, što ŭ časie jahonaha adjezdu pabłytali jahony pašpart z pašpartam syna.
1 śniežnia
Va ŭročyščy Kurapaty ŭ čarhovy raz apahanienaja łava Klintana – memaryjalny znak, padorany prezydentam ZŠA «ad narodu Złučanych Štataŭ Ameryki narodu Biełarusi ŭ imia pamiaci». Vandały skinuli łaŭku na ziamlu, raskidali kvietki i śviečki.
Haradzienskaja milicyja papiaredziła A.Milinkieviča ab tym, što jon nia maje prava ładzić ekskursii pa horadzie dla vialikich hrupaŭ ludziej. Lider apazycyi pryjechaŭ u Horadniu sustrecca z vybarščykami i sabrać podpisy ŭ padtrymku demakratyčnych kandydataŭ. Adnačasova jon źbiraŭsia pravieści ekskursiju, kab pryciahnuć uvahu da taho, jak adbyvajecca rekanstrukcyja histaryčnaj častki Horadni.
2 śniežnia
Padčas praviadzieńnia ŭ Lidzie palityčnaj kampanii «miascovyja vybary» nieviadomyja razmalavali aŭtamabil A.Milinkieviča ŭ čyrvona-zialonyja kolery. Uvieś čas znachodžańnia Milinkieviča ŭ Lidzie za im sačyła milicyja, ludzi ŭ cyvilnym, ź jakimi taksama pracavała kamera i žurnalisty lidzkaha TB.
3 śniežnia
Kiraŭnička niepryznanaha ŭładami Sajuzu palakaŭ Anžalika Borys i jaje kiroŭca Andžej Lisoŭski atrymali pazovy na 6 śniežnia. Jany musiać źjavicca na dopyt u KDB da śledčaha, jaki zajmajecca kryminalnaj spravaj ab kantrabandzie narkotykaŭ.
6 śniežnia ŭ Anžaliki Borys zabrali pašpart.
3 śniežnia byŭ vyklikany ŭ milicyju aktyvist Sajuzu palakaŭ Ihar Bancar. Jon nibyta pahražaŭ Tadevušu Kručkoŭskamu – adnamu z kiraŭnikoŭ aficyjnaha Sajuzu palakaŭ Biełarusi.
Alesia Jasiuk była zatrymanaja ŭ Miensku padčas raspaŭsiudžvańnia nalepak «Džyns – za svabodu!». Žančynu advieźli ŭ aporny punkt milicyi Leninskaha RUUS, dzie, pavodle jaje słovaŭ, jaje źbiŭ major milicyi Falej I.V. Sudmedekspertyza zafiksavała ŭ žančyny paboi. Jana rychtuje skarhu na niepravamiernyja dziejańni milicyjanta.
U Mahilovie ŭ rajonie Savieckaj płoščy, na piešachodnym moście, znoŭku źjaviŭsia bieł-čyrvona-bieły ściah. Jon pravisieŭ 50 chvilinaŭ.
4 śniežnia
Alaksandr Milinkievič byŭ zatrymany ŭ Biełaaziorsku (Bieraściejščyna). Padstava: pavodle ananimnaj infarmacyi ŭ aŭtamabili palityka pieravozili alkahol i narkotyki. Razam ź Milinkievičam zatrymali jaho pres-sakratara Paŭła Mažejku i kiraŭnik mienskaj abłasnoj Rady Partyi BNF Alaksieja Kavalca. Paśla dahladu aŭto i asabistych rečaŭ palitykaŭ adpuścili.
Palitźniavoleny Pavał Sieviaryniec atrymaŭ trochdzionny adpačynak, z 4 pa 6 śniežnia ŭklučna. Jon musiŭ pryjechać u Viciebsk jašče 29 listapada. Adnak napiaredadni ŭ administracyi vypraŭlenčaj ustanovy Paŭłu zajavili, što pakidać speckamendaturu jamu zabaroniena da 10 śniežnia.
Viktar Statkievič, baćka palitviaźnia Mikałaja Statkieviča, źviarnuŭsia da načalnika Departamentu vykanańnia pakarańniaŭ Koŭčura V.A. z zajavaj. V.Statkievič, siarod inšaha prosić viarnuć syna ŭ Baranavičy, bo praz stały ŭzrost i kiepskaje zdaroŭje maje patrebu ŭ dohladzie. M.Statkievič byŭ pieraviedzieny z Baranavič u Błoń Puchavickaha rajonu.
5 śniežnia
Alaksandar Kazulin admoviŭsia spynić haładoŭku padčas sustrečy z žonkaj 5 śniežnia. Pavodle turemnych daktaroŭ, za 47 dzion haładoŭki palityk starciŭ 26 kh, u jaho niebiaśpiečna paniziŭsia cisk i tempieratura.
Staršynia Mienharsudu M.Ardziaka nie zadavoliŭ nadzornuju skarhu pa spravie eks-kandydata ŭ prezydenty A.Kazulina. Kazulin i jaho abaroncy majuć namier abskardzić rašeńnie ŭ Viarchoŭnym sudzie.
Adbyłosia papiaredniaje sudovaje pasiadžeńnie Haspadarčaha suda Mienska pa spravie ab skasavańni damovy arendy z MHA «Zhurtavańnie biełarusaŭ śvietu «Baćkaŭščyna». Sudździa Mielnikava aznajomiłasia z pretenzijami bakoŭ. Nastupnaje pasiadžeńnie budzie 12 śniežnia.
Sudovyja vykanaŭcy kanfiskavali kamputarnuju techniku RHA «Biełaruski Chielsinkski kamitet» (BCHK). Zroblena heta było ŭ vykanańnie rašeńnia Vyšejšaha Haspadarčaha sudu pa spravie ab padatkaabkładańni srodkaŭ, jakija byli atrymanyja ŭ ramkach prahramy TASIS.
Biełaruskija ŭłady nie zhadzilisia na praciah vizaŭ siami ksiandzam i piaci siostram-zakońnicam, hramadzianam Polščy, što pracavali ŭ Haradzienskaj katalickaj dyjacezii. Da kanca śniežnia jany pavinny pakinuć Biełaruś. Ułady tłumačać rašeńnie patrebaj uładkavać na vyzvalenyja miescy maładych śviataroŭ i siostraŭ – biełaruskich hramadzianaŭ.
