200 fukusimcaŭ ratujuć Japoniju. Što matyvuje na hierojstva ŭ libieralnym hramadstvie? 11

Likvidatary zhadžajucca, što ich los raŭnasilny «śmiarotnamu prysudu»,

piša The Daily Mail. Pavodle infarmacyi brytanskaj haziety, japoncy prajaŭlajuć u takoj składanaj situacyi redkuju razvažlivaść i mužnaść — dobraachvotnikami na śmiarotna niebiaśpiečnuju pracu zapisvajucca supracoŭniki starejšaha ŭzrostu, u jakich užo darosłyja dzieci. Jany kažuć, što im užo niama čaho stračvać, u adroźnieńnie ad maładych rabočych, jakim jašče treba kłapacicca pra siemji ci jašče tolki treba zavieści dziaciej.

Advažnuju bryhadu likvidataraŭ pačciva nazyvajuć «piaćdziasiat fukusimcaŭ», choć, jak adznačaje vydańnie, nasamreč ich, vidavočna, kala 200. Napiaredadni japonskaje telebačańnie pakazała intervju ź ich svajakami, jakija nieciarpliva čakajuć ich doma, razumiejučy ŭ toj ža čas, što mohuć užo bolš nie ŭbačycca. Jany raskazali, što atrymlivajuć ad svaich baćkoŭ i mužoŭ kranalnyja pasłańni. Pry hetym, niahledziačy na ŭvieś ciažar situacyi, rodnyja «śmiarotnikaŭ» kažuć, što biaskonca hanaracca imi.

Da ciapierašniaha momantu jość nieaficyjnaja infarmacyja pra 5 zahinułych likvidataraŭ, jašče bolš za 20 byli paranienyja. Jak paviedamlaje presa, kambiniezony z reśpiratarami, u jakich pracujuć hetyja ludzi, źjaŭlajucca čysta simvaličnaj abaronaj. Tak što pry značnym padvyšeńni ŭzroŭniu radyjacyi šancaŭ niama.

Zachodniaja presa razvažaje pra «prymus da hieraizmu»

Na fonie hetych paviedamleńniaŭ zachodniaja presa razvažaje, ci moža libieralna-demakratyčnaje hramadstva prymusić svaich hramadzian da hieraizmu. «Japonija — nie aŭtarytarnaja dziaržava, — piša ŭ piatnicu Süddeutsche Zeitung. — Nieŭzabavie paśla taho jak u 1986 hodzie zdaryłasia katastrofa ŭ Čarnobyli, savieckaje kiraŭnictva nakiravała tudy tysiačy maładych sałdat, tak zvanych likvidataraŭ… Japonski ŭrad takoj mahčymaści nie maje».

Jak adznačaje aŭtar artykuła, na jakuju spasyłajecca InoPressa, takoha kštałtu maralna-etyčnyja prablemy ŭ toj ci inšaj stupieni zakranajucca z roznaj stupieńniu pierakanaŭčaści i vyrašajucca ŭ znakamitych halivudskich filmach «Dzień niezaležnaści», «Armahiedon» i «Gran Torino».

U hramadska-palityčnaj sistemie, «u jakoj indyvidu davodzicca adstojvać svaje intaresy ŭ sutyknieńni z hramadstvam, jak heta adbyvajecca ŭ sučasnym hramadstvie infarmacyjnaha kapitalizmu, salidarnaść robicca vielmi sumnieŭnaj vartaściu»,

kanstatuje niamiecki žurnalist.

U Japonii davodzicca achviaravać žyćciami adnych ludziej dziela zachavańnia žyćcia inšych, havorycca ŭ materyjale. Inšymi słovami, dla taho, kab praciahnuć astudžeńnie paškodžanaha reaktara, nakolki heta mahčyma, patrabujucca pamočniki, jakim daviadziecca padvierhnucca apramianieńniu, jakoje nanosić ciažkuju škodu čałaviečamu arhanizmu.

Kožny viedaje, što vojnaŭ biez zahinułych nie byvaje, piša ŭ zaklučeńnie aŭtar. Ale ŭ vypadku vykarystańnia ludziej pry astudžeńni reaktara na AES «Fukusima-1», pry jakim vierahodnaść ich śmierci takaja vialikaja, hetaja prablema nabyvaje jašče bolšuju vastryniu.

KaM pavodle zamiežnych ŚMI

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH