22 sakavika Mienski haradzki sud abvieści prysud pradprymalniku i siabru Abjadnanaj hramadzianskaj partyi Andreju Bandarenku. Jaho vinavaciać u ekanamičnych złačynstvach, ale svajaki i palityki nazyvajuć spravu Andreja Bandarenki palityčna matyvavanaj.
Pradprymalnik i siabra AHP Andrej Bandarenka adbyŭ dva hady źniavoleńnia. Raniej jaho pryznali vinavatym u kradziažy i machlarstvie. Za hety čas jahonuju spravu pierahladali dvojčy. I 22 sakavika budzie abvieščany prysud pavodle treciaha razhladu. Paviedamlaje siabra AHP Hanna Krasulina:
«Heta znoŭ sud pieršaj instancyi paśla taho, jak Viarchoŭny sud vynies pratest, a prezydyjum Mienskaha haradzkoha sudu hety pratest pryniaŭ adnosna papiaredniaha vyraku. I zaraz u Mienskim haradzkim sudzie razhladajecca hetaja sprava, jak sud pieršaj instancyi, choć nasamreč heta treci razhlad. Ale hetkim čynam jaho znoŭ možna budzie apratestavać».
U 2008 hodzie Andrej Bandarenka balatavaŭsia ŭ deputaty Pałaty pradstaŭnikoŭ, ale ŭ parlament nie patrapiŭ. Bandarenka sprabavaŭ asprečyć vyniki hałasavańnia, a ŭ vyniku apynuŭsia za kratami na 6 hadoŭ.
Baćka pradprymalnika Valery Bandarenka nia vieryć, što jahony syn vinavaty, i što sudy na im byli spraviadlivyja: «Jakaja spraviadlivać? Heta absurd. Prakuror na pieršym sudzie začytaŭ toje ž abvinavačańnie, što i zaraz. Na pieršym sudzie jon paprasiŭ dzieviać hadoŭ, a na hetym sudzie — za toje ž samaje — užo šeść. Chacia b heta — jakaja tut spraviadlivaść? Nie zadaŭ nivodnaha pytańnia za ŭvieś sud, Ale raptam pamianiaŭ artykuł — užo nie kradziož, a machinacyi — žudasna».
Pomstaj za aktyŭnuju hramadzianskuju pazycyju źniavoleńnie Andreja Bandarenki nazyvaje namieśnik staršyni AHP Leŭ Marholin: «Hetuju spravu ja mahu prakamentavać jak palityk i jak ekanamist. Kali čałavieku vystaŭlajuć abvinavačańnie, kali jon nia mieŭ nijakich pravoŭ na kiravańnie pradpryjemstvam — nia byŭ ni kiraŭnikom, ni hałoŭnym buchhaltaram, to heta nonsens. Tamu ja liču hetuju spravu palityčna matyvavanaj, jakaja ŭźnikła paśla taho, jak Andrej pryniaŭ udzieł u parlamenckich vybarach».
Kali Andrej Bandarenka apynuŭsia za kratami, jahonaj dačce było 6 miesiacaŭ. Ciapier dziaŭčyncy spoŭniłasia 2,5 hady.
