Klasyčnaje qui pro quo! Pa-našamu kažučy, chto ŭ les, a chto pa drovy. Dakładniej, pa haz. Bo maju na ŭvazie śviežyja zajavy akurat u hazavym pytańni.
Voś što kaža pra košt błakitnaha paliva pradstaŭnik rasiejskaj manapolii Kupryjanaŭ, a voś što — premjer Sidorski.
Tym časam užo i deputat Kučynski zaklikaje ŭrad da realizmu.
Praŭdu kažučy, premjer Sidorski vyhladaje čałaviekam zusim ćviarozaha ładu myśleńnia.
Ale ž... "Nam by tolki dzień prastajać dy noč pratrymacca!".
Karaciej, doŭžycca faza infarmacyjnaje vajny. A na vajnie jak na vajnie. Napierad, na miny!
Dy jašče ajčynnyja ŭłady bajacca napałochać raniej času elektarat. Toj i tak užo pakrysie pačynaje tryvožycca, bo paŭzuć čutki pra skačok darahoŭli paśla Novaha hodu. A čutkam navat lajalny abyvatal daviaraje bolej, čym jak aficyjoznym medyjam.
Va ŭsiakim razie, asobnyja kamentatary słovaŭ Pucina, badaj, trochi paśpiašalisia "pradać" pałovu našaje truby rasiejcam.
Jašče nia viečar.
Darečy, znajšoŭ u svaim archivie fota 2004 hodu. Tady my, hrupa biełaruskich žurnalistaŭ, mieli sustreču ź Mileram u hazpromaŭskim chmaračosie-ałoŭku.
Ci nia praŭda, siońnia hetaja "cahlina" nabyvaje charaktar šmatznačnaha symbalu?
Sama ž vandroŭka ŭ Maskvu była nieŭzabavie paśla pieršaj hazavaj vajny. Tady kiraŭnik karparacyi skazaŭ: pastaŭki hazu pavodle cany piataha pojasu Rasiei mahčymyja tolki ŭ vypadku "realnaj intehracyi".
Što pad hetaj formułaj maje na ŭvazie Maskva, naviednikam sajtu "NN", miarkuju, nadta tłumačyć nia treba.
Akramia taho, na majo pytańnie — nakolki palityka karparacyi ŭzhadniajecca z Kramlom? — Miler lakanična adkazaŭ: my — dziaržaŭnaja kampanija...
Miž tym biełaruskaja prapahanda jašče i siońnia sprabuje davieści pra dobraha cara Uładzimiera, jaki nibyta nia viedaje pra svavolstvy hazpromaŭskich menedžeraŭ.
Ale ŭžo, musić, i ćviordy elektarat moža z troch razoŭ zdahadacca, z čyjho błasłavieńnia "Hazprom" vypisvaje ałoŭkam $200 dy stavić "cahlinu" na šlachu tannaha enerharesursu ŭ Biełaruś.
Epocha hazu ŭ abmien na pacałunki skončyłasia.
"Bratniaja intehracyja" vyłazić bokam.
