Zvažać na biezhustoŭnaje azdableńnie nia varta. Biełaruskamoŭny dysk hramadzianki Rasiei – pradukt jakasny i prezentabelny. Ahurbaš-Jalinskaja krychu nie daciahvaje da toj roli, jakuju vykonvaje Vierka Siardziučka dla Ŭkrainy, ale papularyzavać biełaruskuju pieśniu na postsavieckich jana zdoleje. Padborka piesień – zvyšpapsovaja. I heta dobra – «Kasiŭ Jaś», «Ja ž ciabie padmanuła», «Kupalinka» zapaminalnyja i dobra viaznuć na vušach tych, chto nia jość nośbitam biełaruskaj movy. Značyć, adnu funkcyju dysk paśpiachova vykonvaje.
Druhaja častka prahramy – pieśni, jakija tady jašče Lika Jalinskaja śpiavała ŭ paru «Vierasoŭ», kali dla jaje štatnym paradkam pisali Uładzimier Niaklajeŭ i Leanid Prančak. «Raz dy razok», «Biełaje vino dy čyrvonaje», «Małady dy niežanaty» – dla nastalhujučych pa śvietłych časach biełaruskaj estrady, kali hałoŭny dyryžor krainy vitaŭsia z usimi słovami «Žyvie Biełaruś!», a estradniki stvarali cełyja cykli piesień na temu Adradžeńnia. «Uzdymiem horda bieł-čyrvona-bieły ściah», – heta zapieŭ ź pieśni «Naŭzdahon» toj ža Jalinskaj, što, vidać, z pryčyn karektnaści nia trapiła ŭ hety albom.
Urešcie, jość na «Biełarusačcy» i absalutny śviažak, stvorany Ahurbaš užo za maskoŭskim žyćciom. Jak pieśnia «Vianok» na vierš taho ž Niaklajeva. Prafesijna aranžavana, čyścieńka zapisana, z uvahaj na bek-vakały i małazaŭvažnyja hitarnyja partyi, z emocyjaj i pačućciom praśpiavana.
