Vysiłkami siabroŭ TBM pačało pracu biuro pierakładaŭ «LINGVA-BY». Jano ažyćciaŭlaje pierakład na biełaruskuju, rasiejskuju, anhielskuju, niamieckuju, polskuju, litoŭskuju movy, a taksama sa švedzkaj i francuskaj moŭ. Nieŭzabavie śpis papoŭnicca českaj movaj.
Kaardynatar Siaržuk Kručkoŭ nazyvaje pryčynaj stvareńnia biuro častyja zvaroty da hramadzkaha abjadnańnia z boku ajčynnych i zamiežnych vytvorcaŭ z prośbami pierakłaści dakumentacyju na biełaruskuju movu. Biuro maje šerah asablivaściaŭ, jakija adroźnivajuć jaho ad inšych pierakładčyckich kantoraŭ. Adna ź ich — usie pierakładčyki nia tolki na prafesijnym uzroŭni vałodajuć zamiežnymi movami, ale jość aktyŭnymi nośbitami biełaruskaj, što dazvalaje im rabić pramy pierakład z/na biełaruskuju. Heta ekanomić čas dy pazbaŭlaje klijentaŭ ad dadatkovych vydatkaŭ.
Pryjom zamovaŭ, apłata i atrymańnie padrychtavanaha pierakładu moža ździajśniacca praź Internet. Pry hetym stvaralniki servisu padkreślivajuć niekamercyjnaść svajoj dziejnaści. «Hałoŭnaja zadača ŭ tym, kab maksymalna pašyryć vykarystańnie biełaruskaj movy siarod ajčynnych vytvorcaŭ», — kaža S.Kručkoŭ. U prajekcie zadziejničanyja vypuskniki Linhvistyčnaha ŭniversytetu, Instytutu movaznaŭstva NAN Biełarusi, biełarusy zamiežža.
Biuro ŭžo maje ŭ aktyvie stałych klijentaŭ. Heta TAA «Akvasan» — vytvorca bytavoj chimii, pradstaŭnictva firmy «Boš» u Biełarusi, Biełaruskaja čyhunka, Mienski metrapaliten, francuskaje pasolstva, fabryka kandytarskich vyrabaŭ «Słodyč», Dziaržstandart. Taksama hatovyja pierakłady: prajekt novych biełaruskich praviłaŭ darožnaha ruchu, pierakład sajtu BELSYS GROUP (mižnarodnyja hruzapieravozki), paštovaj słužby «Telehraf», lakalizacyja prahramy Internet-telefanii Skype, lakalizacyja kompleksu dystancyjnaha navučańnia Moodle, Dziaržstandart «Tavary niecharčovyja».
Bolš padrabiazna paznajomicca ź dziejnaściu servisu možna pa adrasie www.lingva-by.com. Tamsama možna znajści rascenki na pasłuhi.
Dziejnaść biuro maje dyscyplinavać jak svaich, tak i zamiežnych vytvorcaŭ, čyja pradukcyja afarmlajecca pa-biełarusku. Zastajecca čakać, što biełaruski spažyviec nia budzie bolš łamać hałavu nad dziŭnymi inhredyjentami rasiejskaj makarony «Makfa», siarod jakich jość i zahadkavy płušč.
