Były čylijski dyktatar Aŭhusta Pinačet pamior u vajennym špitali ŭ niadzielu a 19.15 pa mienskim časie. 25 listapada jon śviatkavaŭ svoj 91 dzień narodzinaŭ i mienavita tady zajaviŭ, što ŭskładaje ŭsiu adkaznaść na siabie za represii 1970-ch. Tydzień tamu Pinačet pieražyŭ abšyrny infarkt.
Aŭhusta Pinačet (Pinochet) u kancy žniŭnia 1973 h. byŭ pryznačany prezydentam Čyli Salvadore Aljende hałoŭnakamandujučym uzbrojenych sił, a ŭžo 11 vieraśnia 1973 h. ździejśniŭ dziaržaŭny pieravarot. Padčas vieraśnioŭskich padziej u Čyli zahinuli 200 čałaviek, u tym liku i S. Aljende, a za čas dyktatury eksadrony śmierci źniščyli 3197 čałaviek, kala 2 tys. źnikli biaź viestak. Takaja była cana za pieraadoleńnie kryzysu i padvyšeńnie dabrabytu nasielnictva.
Niekalki hadoŭ tamu Pinačet - a jon kiravaŭ krainaj da 1990 h. -- byŭ aryštavany ŭ Eŭropie, adnak dabicca jahonaj ekstradycyi nie ŭdałosia. Były dyktatar byŭ vyzvaleny. Tym nia mienš pa viartańni ŭ Čyli jaho čakali kala 300 pazovaŭ u sud u spravie parušeńnia pravoŭ čałavieka. A ŭ 2004 h. ad jaho adviarnulisia i mnohija prychilniki, daviedaŭšysia, što Pinačet prysabiečyŭ 27 młn dalaraŭ, raźmiaściŭšy ŭ zamiežnych bankach.
Da kanca žyćcia Aŭhusta Pinačet byŭ upeŭnieny, što rabiŭ usio na karyść Čyli i dziela padvyšeńnia dabrabytu suajčyńnikaŭ.
Daviedaŭšysia pra śmierć dyktatara, tysiačy čylijcaŭ vysypali na vulicy Čyli, kab śviatkavać jahony sychod. Na vulicach i płoščach viesialacca i pjuć šampanskaje. Tych, chto smutkuje, u niekalki razoŭ mieniej.
Čylijskija ŭłady pryniali rašeńnie nie chavać eks-dyktatara z usimi prezydenckimi ŭšanavańniami. Jaho pachavajuć jak vajennaha, kiraŭnika čylijskaj armii.
