U kłubie «Reaktar» vystupić anhlijski hurt The Tiger Lillies. Na hety kancert ludzi jeduć až z Charkava.
Bolšaść słavutych zamiežnych muzykantaŭ, jakija zavitvajuć u Biełaruś, vystupajuć na vialikich placoŭkach i za narmalny kvitok na ich mnohim daviadziecca vykłaści pałovu zarobku.
Ale narešcie adbyłosia (a dakładniej adbudziecca) i na našaj vulicy śviata. U Minsk jedzie trya The Tiger Lillies.
Čamu śviata? Tamu što, pa-pieršaje, «Tyhravyja lilei» — nie zasłužany piensijaniery rok-n-rołu, a sučasnyja zorki z suśvietnym imiem — daduć kłubny kancert z bolš čym demakratyčnymi koštami na kvitki (ad 60 tysiač). Pa-druhoje, hrajuć jany ŭ tym styli, jaki słavianskaj mientalnaści vielmi blizki — heta virtuoznaje kabare, jakoje spałučaje ŭ sabie čorny humar, bahiemna-marhinalnuju tematyku, cyhnaskija notki i ŭsio heta prypraŭlena enerhijaj i praniknionaściu ŭ najlepšych tradycyjach Biertolda Brechta.
The Tiger Lillies čym tolki nie zajmalisia — jany vystupali razam sa znakamitym strunnym kvartetam Kronos Quartet, vialikim indastryał-kampazitaram Bliksam Barhieldam, zapisvalisia razam sa skandalnym rasiejskim hurtom «Leninhrad» (nazvu alboma ŭ haziecie i padać niama jak — niecenzurnaja). U peŭnym sensie jany duchoŭnyja naščadki Toma Uejtsa, kali ŭjavić što amierykanski hienij ałkaholnych iluzij i vałacužnaj ramantyki raptam pierajšoŭ na falcet i padchapiŭ cyhanska-pankaŭski virus.
Śpiavajuć «Lilei» pra toje, pra što ŭ «prystojnych damach» razmaŭlać nie pryniata: ad žyćcia tranśviestytaŭ i narkamanaŭ da prablemaŭ seksu siarod much. Padčas prasłuchoŭvańnia ich zapisaŭ zdajecca, što jany byli b da miesca ŭ francuzskich kabare 30-ch, tych, dzie amal nieprytomnuju ad dopinhaŭ Edzit Piaf vazili ad placoŭki da placoŭki.
Šoŭ u ich taksama adpaviednaje-to zavadnyja aviečki pa scenie biehajuć, to bubnač raźbivaje svoj instrumient, to vakalist pačynaje prykidvacca varjatam. Hetaje šoŭ, nastolki palubiłasia našym uschodnim susiedziam, što adzin čas było nie zrazumieła — heta Tiger Lillies uvieś čas jeduć u Rasiju, ci «Tyhrovyja Lilei» časam katajucca ŭ Jeŭropu… Darečy pa internecie hulajuć roliki, u jakich muzykanty hurtoŭ «Nahual», «Srebnaje viasielle» i «RokierDžokier» zaklikajuć prychodzić na kancert i robiać heta nasamreč ščyra.
