CUM abrabavaŭ Robin Hud z kryminalnymi ambicyjami

U pačatku krasavika, u noč z 2-ha na 3-ha, staličny CUM pazbaviŭsia vialikaj partyi roznych darahich tavaraŭ — kradziažu takoha pamieru ŭ historyi adnoj z najstarejšych kramaŭ horada jašče nie było. Złodzieja vyličyli, što nazyvajecca, pa haračych śladach. Matyvacyja jaho ŭčynku ździviła navat daśviedčynych apieratyŭnikaŭ.

Jak vyśvietliła śledstva, hramadzianin B. — 26-hadovy biespracoŭny žychar Maładziečna — skarystaŭsia tym, što ŭ budynku kramy idzie ramont, i schavaŭsia ŭ zacišnym kutku.

Unačy jon spakojna prajšoŭsia pa pavierchach, źbirajučy raniej vybranyja tavary — darahuju optyku, fotaaparaty, juvielirnyja vyraby, pakinutyja ŭ kasach hrošy.

Adnak kali jon pasprabavaŭ adkryć adnu ź vitryn, spracavała sihnalizacyja.

Prybyły narad rajonnaha adździeła Departamienta «Achovy» ničoha padazronaha nie ŭbačyŭ, jak i nie vyjaviŭ ludziej u pamiaškańni. Milicyjanty vyrašyli, što adbyŭsia techničny zboj achoŭnaj sihnalizacyi.

Nieŭzabavie paśla vizitu milicyjantaŭ złamyśnik praciahnuŭ svoj rejd pa vitrynach i pryłaŭkach. Zatym małady čałaviek vybraŭsia praz akno pieršaha paviercha, sihnalizacyja na jakim była demantavanaja praz ramont.

Pryjechaŭšy ŭ svoj rodny horad, złamyśnik pieradaŭ techniku na realizacyju znajomamu achoŭniku z načnoha kłuba, niejkamu D. Taksama pryjacieli zrabili niekalki tajnikoŭ, u jakich schavali juvielirnyja vyraby.

Złamyśnika zatrymali pa haračych śladach. Pryčym znajšli jaho vielmi prosta: «palcy» ź miesca zdareńnia supali z tymi, što zachoŭvalisia ŭ milicejskaj kartatecy — maładziečaniec raniej byŭ sudzimy za razboj i kradziež. Zrešty, adbitki palcaŭ dakazvajuć tolki toje, što kankretny čałaviek niadaŭna byŭ u CUMie. A raptam jon vybiraŭ piarścionak kachanaj dziaŭčynie i pakinuŭ ślady na pryłaŭku?

Kali apieratyŭniki pryjšli pa padazravanaha, jon pryznaŭsia ŭ kradziažy. Momantam ža najvyšejšaj asałody dla jaho byŭ vizit žurnalistaŭ-televizijonščykaŭ.

Šmatlikija padazravanyja sprabujuć schavacca ad telekamiery, a hramadzianin B. z zadavalnieńniem paziravaŭ! Praŭda, nie chacieŭ pryznavacca, dzie schavana kradzienaje, ale ŭ hetym pytańni na dapamohu śledstvu pryjšoŭ hramadzianin D. i pakazaŭ usie schovanki.

Namieśnik načalnika śledčaha adździeła Savieckaha RUUS h. Minska Alaksandr Lubaskin pytaŭsia ŭ padazravanaha pierad aryštam: navošta ŭčyniŭ złačynstva? Toj vystaviŭ siabie nu prosta Robin Hudam, adkazaŭšy aficeru milicyi: «Dziaržava „kidaje“ ludziej, voś ja i vyrašyŭ jaje pakarać».

Padčas dopytu, užo ŭ statusie abvinavačanaha, hramadzianin B. raskazaŭ śledčamu: «Ja ŭčyniŭ hety kradziež, kab padniać svoj aŭtarytet siarod kryminalnych asobaŭ. Heta ž kruta: abrabavać CUM; takoha ŭ Minsku jašče nie było! Tamu i „palcy“ pakinuŭ, kab znajšli mianie!».

Na ciapierašni momant vyśvietlenaja suma materyjalnaj škody — kala 700 miljonaŭ rubloŭ.

Praktyčna ŭsia jana kampiensavanaja, bo złamyśnik nie paśpieŭ realizavać skradzienaje.

U dačynieńni da hramadzianina B. zaviedzienaja kryminalnaja sprava pa č.4 artykuła 205 KK Biełarusi — kradziež u asabliva bujnym pamiery, jaki praduhledžvaje pazbaŭleńnie voli na termin ad 3 da 12 hadoŭ z kanfiskacyjaj majomaści.

Dla dziejańniaŭ jaho pryjaciela hramadzianina D., jaki dapamahaŭ chavać skradzienaje, taksama jość kvalifikacyja ŭ KK — artykuł 236: nabyćcio abo zbyt materyjalnych kaštoŭnaściaŭ, zdabytych zahadzia złačynnym sposabam.

Biełaruskija naviny

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH