Takoje ŭražańnie, što ŭ zakaruzłym biełaruskim pytańni pačynajucca ci voś-voś pačnucca tektaničnyja zruchi.
Naiŭna dumać, što ź dnia na dzień my pračniemsia ŭ inšaj krainie. Chutčej što i paśla sustrečy Łukašenki z Pucinym u Maskvie 15 śniežnia aficyjnaj infarmacyi budzie kaliva, jak heta było paśla pieramovaŭ ŭ listapadzie.
Ale možna sabie ŭjavić, jaki armresllinh razhortvajecca zaraz u dvuchbakovych stasunkach.
Faktyčna Maskva pierajšła da poŭnamaštabnych ekanamičnych sankcyjaŭ.
Naturalna, u biełaruskaj prapahandy pry ŭsim jaje cyniźmie nie pavaročvajecca jazyk kazać takoje pra stasunki ŭ miežach chaj sabie i virtualnaj sajuznaje dziaržavy. Adnak nasamreč...
Rynak rynkam, a my ž nadta dobra viedajem, jaki mahutny palityčny składnik prysutničaje ŭ tym, što eŭfemistyčna nazyvajecca dačynieńniami haspadarčych subjektaŭ dźviuch krainaŭ.
Učora ŭ studyi radyjo "Svaboda" ja pačuŭ ad deputata Kaściana: maŭlaŭ, zaraz Maskva, bieručy Biełaruś za harlak, faktyčna vykonvaje zaakijanskuju volu.
Vo jak! Imperyjalisty ŭsich krainaŭ, jadnajciesia!
U Maskvy i Zachadu, naturalna, zusim adroznyja mety.
Palitolah Karahanaŭ, choć i staić na čale dvuchbakovaj pravaabarončaj kamisii, zakidaje biełaruskamu režymu najpierš antyrasiejskaść.
Ale fakt toje, što heta vielmi niebiaśpiečny markier. Ličy, pastavili na adnu roŭnicu ź niejkim Saakašvili, katory nikoli nia klaŭsia kłaścisia pad nataŭskija tanki.
Ź inšaha boku, Brusel stvaraje narešcie niejkaje padabienstva palityki puhi i piernika. Bonusy za demakratyzacyju, vykindes z preferencyjaŭ za ŭcisk niezaležnych prafsajuzaŭ (za hetaj farmuloŭkaj z padačy Mižnarodnaj arhanizacyi pracy stajać, naturalna, kudy šyrejšyja pretenzii).
Nu i Štaty hnuć svajo. Padoŭžyli dziejańnie "Aktu ab demakratyi". Navat pasprabavali ŭpliščyć biełaruskaje pytańnie ŭ farmat Rady biaśpieki AAN (chaj sabie davoli niaŭkludna i ź vidavočna pijaraŭskaj metaj).
Ale fakt toje, što zaraz pad ciskam z roznych bakoŭ režym pačynaje nahadvać parachod "Čaluskin" u Ledavitym akijanie.
Kudy drejfavać? Na paśpiešliva skanstrujavanuju ŭ mazhach tutejšych stratehaŭ "vialikuju duhu vonkavaj palityki" nasamreč nadzieja pryvidnaja.
Dyk što, nasupierak klatvam, daviadziecca sastupać trubu?
U niezaležnyja medyi pratačyłasia versija, što varyjant prodažu "Biełtranshazu" bakami faktyčna ŭzhodnieny.
Mahčyma, na ekspertnym uzroŭni niejkija papiery nasamreč padrychtavanyja. Ale ž hałoŭnaje — palityčnaje rašeńnie.
I voś tut — hłybokaja paŭza.
Reč nia stolki ŭ samoj trubie. Ekanamist Leanid Zaika (na zdymku) dniami pierakonvaŭ mianie, što stratehičnaja vaha hetaha žaleźzia razadźmutaja.
Adnak ža my viedajem, jak razvalvajecca kartkavy damok. Dastatkova vysmarhnuć adnu kartu.
My viedajem, što takoje efekt damino. I jość adčuvańnie, što ŭłada nadta baicca hetaha efektu.
Narešcie, my viedajem, jak, padtočany mienavita ekanamičnymi čyńnikami, umomant abrynuŭsia Saviecki Sajuz.
Chacia majo pakaleńnie "zroblenych u SSSR" było ŭpeŭniena, što pražyć žyćcio daviadziecca mienavita ŭ toj krainie (heta potym stała vyśviatlacca, što ci nia ŭsie byli zamaskavanymi dysydentami :).
Biełaruskaja anamalija zaciahnułasia. Ale chiba što pad upłyvam chvilinnaj słabaści moža milhać rospačnaja dumka, što hetaja anamalija zdolnaja doŭžycca cełuju viečnaść.
Tektaničnyja zruchi, chaj sabie vymiaranyja pakul što milimetrami, mahčyma, užo iduć.
My abaviazkova pračniemsia niekali u inšaj krainie.
Fota Bymedia.net i z archivu aŭtara.
