Na pracesie, što idzie ŭ Minsku, eks-kandydat u prezidenty vystupiŭ z zaklučnaj pramovaj.
Vysoki sud, pavažanyja prysutnyja!
Nie budu raźbirać absurdnaść abvinavačvańniaŭ. Sudovaje raźbiralnictva pakazała ich nadumanaść. Maju spravu ja razhladaju jak prajavu strachu ŭłady pierad niepaźbiežnymi pieramienami. Žadańnie nakazać tych, chto nie zhodny z palitykaj praviačaj ułady. Heta jašče i palityčnaja rasprava nad kandydatam, jaki skłaŭ realnuju kankurencyju Łukašenku. Ja byŭ i zastajusia prychilnikam adkrytych i rašučych dziejańniaŭ po źmianieńni ŭłady ŭ Biełarusi.
Usio, što adbyvajecca – heta pradumanaja maštabnaja pravakacyja ŭłady.
Na heta ŭkazvajuć słovy Łukašenki, što paśla vybaraŭ jon z usimi raźbiarecca. Słovy Makieja, jaki havaryŭ ab najaŭnaści dokazaŭ, što rychtujucca siłavyja akcyi z boku apazicyi z bajevikami. Ale ŭ hetaj spravie nie pradstaŭlena nivodnaha dokazu. Słovy Jarmošynaj, jakaja abviaściła, što paŭnamoctvy kandydataŭ zakančvajucca ŭ 20.00 19 śniežnia, a nie paśla aficyjnaha ahałošvańnia vynikaŭ vybaraŭ. Tym samym jana dała admašku siłavym orhanam dziejničać.
Pravaachoŭnyja orhany nie sprabavali ŭstupić u kantakt z kandydatami da pačatku akcyi, kab zabiaśpiečyć jaje paradak. Jany nie zastalisia kala Doma ŭrada paśla pieršaha bićcia škła, tym samym zaachvociŭšy supraćpraŭnyja dziejańni. Heta paćviardžajuć i nastupnyja zajavy Łukašenki.
Ja vyražaju pavahu da tych ludziej, chto zrabiŭ vybar na karyść praŭdy, achviaravaŭšy svabodaj. Ja hanarusia, čto znachodžusia ŭ kletcy z Hniedčykam, Mirzajanavym, Vasilevičam, Jaromienkam. Dziakujučy im stała bolšaj nadzieja na budučyniu Biełarusi.
U vyniku svaich dziejańniaŭ 19 śniežnia ŭłada kančatkova straciła davier svaich hramadzian i suśvietnaj supolnaści. Nastupstvy hetaha ŭžo zaŭvažnyja siońnia: ekanamičnyja, palityčnyja i navat spartovyja.
Pieravažnaja bolšaść hramadzian choča pieramien. Miljony ludziej delehavali svaju padtrymku tym, chto vyjšaŭ na Płošču. 19 śniežnia adbyłasia nie akcyja pratestu, a akcyja nadziei. My nie tolki pratestavali suprać falsifikacyi vybaraŭ, my prapanoŭvali ŭładzie pieramovy, kab znajści razam vychad z kryzisu. Va ŭładzie nie znajšłosia sumlennych i mužnych ludziej, jakija pryniali b udzieł u pieramovach na Płoščy.
Prapanova dyjałohu 19 śniežnia pryviała da źbićcia mirnych hramadzian.
Ź imi raspraŭlajucca z dapamohaj sudoŭ. Tyja ludzi, jakich ja i nie nadta dobra viedaju, dapamahli mnie ŭ majoj kampanii.
My ŭsie chočam adnaho – žyć u svajoj Biełarusi, nie bajacca za svajo žyćcio. Za heta nas i sudziać, parušajučy zakon.
Chaciełasia b nahadać, što tyja, chto parušaje zakon, niepaźbiežna akažucca na łavie padsudnych.
Bolš za miesiac ja nie davaŭ pakazańni ŭ SIZA KDB. Ja spadziavaŭsia, što hety absurd skončycca. Ja prajšoŭ katavańni, pahrozy. I mnie znoŭ daviadziecca prajści praź ciažkija vyprabavańni. Ale ŭ mianie niama pačućcia nianaviści i pomsty. Zaklikaju sud vynieści zakonny vyrak. Zakonnaść – heta nie vykanańnie supraćpraŭnych ukazańniaŭ.
Mianie pazbavili mahčymaści adździačyć ludziam, jakija padtrymali mianie, chto prahałasavaŭ za mianie. Ja viedaju, što nas bolšaść. My damožamsia svabodnych vybaraŭ!
Ja lublu svaju siamju, ja lublu Biełaruś, ja lublu svabodu. Ja viedaju, što ŭsie ludzi buduć ščaślivyja, kali my staniem svabodnymi.
Žyvie Biełaruś!
* * *
Nahadajem, što sud pakaraŭ Andreja Sańnikava piaćciu hadami turmy. Roŭnieńka prezidencki termin.
