Navahrudak buduje vietraki, kansiervuje zamak i adznačaje 500-hodździe Mahdeburhskaha prava - foty 16

Padobna da taho, što pieršaja stalica Vialikaha Kniastva Litoŭskaha nie žadaje mirycca ź imidžam pravincyjnaha rajcentra. U 2011 hodzie Navahrudak naroščvaje kulturny i enierhietyčny patencyjał.

— Sioleta my adśviatkujem 500-hodździe atrymańnia Navahrudkam Mahdeburhskaha prava, — raskazała karespandentu «Salidarnaści» dyrektar Navahrudskaha historyka-krajaznaŭčaha muzieja Tamara Viaršyckaja. — Da hetaj daty budzie prymierkavany druhi kubak Biełarusi pa histaryčnym fiechtavańni i ŭračystyja mierapryjemstvy, jakija projduć u vieraśni.

Prykładna da hetaha ž času horad upryhožyć pomnik Archaniołu Michaiłu.

Zrešty, pomniki ŭ Navahradku nie redkaść. Čaho vartaja tolki samaja hałoŭnaja słavutaść horada — ruiny zamka.

Dźvie zachavanyja viežy: Ščytoŭku i Kaścielnuju — vyrašana nie adnaŭlać, jak heta było ŭ Lidzie, a na zachodniejeŭrapiejski manier zakansiervavać.

Upraŭleńnie pa achovie historyka-kulturnaj spadčyny i restaŭracyi Ministerstva kultury źbirajecca zaviaršyć kansiervacyju adnaho z najbujniejšych abarončych zbudavańniaŭ Centralnaj Jeŭropy XVI stahodździa ŭ najbližejšyja piać hadoŭ. Abydziecca kansiervacyja ŭ 500 miljonaŭ rubloŭ, jakija vydzielenyja ź biudžetu i sabranyja z dapamohaj łatarei «Skarbnica».

Fatahrafavać Navahrudak možna biaskonca. Paraŭnalna nievialiki horad chavaje na svaich vulicach i zakutkach stolki fotahieničnych siužetaŭ, što dzivu daješsia.

Z krasavika 2011 žychary Navahradka z honaram pačali kazać pra toje, što mienavita kala ich horada źjaviŭsia samy vialiki i mahutny vietrahienieratar u Biełarusi.

— My nie radyja tamu, što ŭ Hrodzienskaj vobłaści pačali budavać atamnuju stancyju. Nie tak užo heta daloka ad nas, — vykazaŭ svajo mierkavańnie žychar Navahrudka Michaił Siamionavič. — A voś viatrak — sprava dobraja. Tym bolš my viedajem, što ŭ nas jon samy mahutny ŭ Biełarusi. Čym drenna zdabyvać elektryčnaść takim sposabam?

90-mietrovy vietrahienieratar pačaŭ vypracoŭvać enierhiju jašče ŭ krasaviku. Heta pieršaja ŭ Biełarusi ŭstanoŭka miehavatnaha kłasu. Mantavać hienieratar pačali ŭ vieraśni minułaha hoda, i ŭžo viasnoj futurystyčny siłuet upryhožyŭ uskrainu horada. Pa słovach adnaho z naładčykaŭ, mantavali ŭstanoŭku kitajskija śpiecyjalisty, a jaje naładkaj zanialisia biełarusy. Pry adpaviednych umovach placoŭku ŭ rajonie pasiołka Hrabniki «zasiejuć» jašče siamiu-vaśmiu vietrakami.

Mnohija miascovyja žychary ličać, što ich horadu patrebien jakasna novy šturšok, jaki pačnie raźvivać horad, jaho infrastrukturu. Ale ŭžo ciapier staražytny Navahrudak robicca jašče adnym prykładam taho, jak možna vykarystoŭvać alternatyŭnyja krynicy enierhii ŭ procivahu «mirnamu atamu».

Siarhiej Bałaj, «Salidarnaść»

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH