Što nie padaražeła paśla devalvacyi? Top-5 22

Bienzin i technika, małako i miasa, sadavina i harodnina, pampiersy, pradmiety hihijeny, pralnyja paraški… — kab pieraličyć usio, što padaražała za apošnija miesiac-dva, nie chopić palcaŭ na rukach i na nahach.

Ale siarod zmroku biełaruskaj ekanomiki možna pašukać kroplu aptymizmu. «Naša Niva» prapanuje top-5 tavaraŭ i pasłuh, ceny jakich nie pavialičylisia. Prynamsi pakul što.

1. Kamunalnyja pasłuhi

Ceny na pasłuhi ŽKH zastajucca na ŭzroŭni, ustalavanym sioleta ŭ lutym. Ale ŭrad nie vyklučaje mahčymaści jašče adnaho pavieličeńnia koštaŭ.

«Dumaju, u hetym hodzie jany pavialičacca na 5–7 dalaraŭ, choć nie vyklučana, što heta pavieličeńnie budzie mienšym», — zajaŭlaŭ vice-premjer Biełarusi Anatol Kalinin 8 krasavika. Tady jon mieŭ na uvazie stary kurs amierykanskaj valuty.

2. Haradski hramadski transpart

Prajezd u aŭtobusach, tralejbusach, tramvajach pa-raniejšamu składaje 850 rubloŭ u stalicy. U rajonnych i abłasnych centrach — 750 rubloŭ. Ceny mohuć być pavialičanyja pa rašeńni miascovych uładaŭ, ale tyja nie śpiašajucca zasmučać pasažyraŭ, choć ustanovy nakštałt «Minsktransa» prosiać ab padaražańni kožny miesiac. Taksi i maršrutki ŭžo paśpieli padniać svaje ceny. Ich łohika zrazumiełaja — aŭtamabilnaje paliva za apošni čas stała daražejšym na 40%. Ale košt tałonaŭ i žetonaŭ naŭrad ci vyrasła tak šmat. Najimavierny varyjant — 1000 rubloŭ za prajezd u stalicy i 900 rubloŭ u inšych haradach.

3. Navučańnie

Ni dziciačyja sadki, ni VNU pakul što nie ŭviali novuju płatu. Za znachodžańnia dziciaci ŭ sadku baćki płaciać kala 60 tysiač u miesiac. Raniej heta było ekvivalentna $20, ciapier — faktyčna $10. Hrošy kampiensujuć častku dziciačaha charčavańnia, reštu płacić dziaržavy. Košt navučańnia ŭ VNU pakul što nie źmianiŭsia, ale moža vyraści razam z rostam zarobkaŭ. Novyja ličby mohuć być ahučanyja bližej da pačatku navučalnaha hoda.

4. Internet

Raźvićcio infarmacyjnych technałohij nie spyniaje navat devalvacyja. Internet-pravajdary nie abviaščali padaražańniaŭ. Naprykład, bieźlimitny dostup da sieciva ad «Biełtelekoma» z chutkaściu da 1 Mbit/s ŭsio jašče kaštuje 54 tysiač rubloŭ. Pravajdary admovilisia ad niečakanych padarunkaŭ abanientam — naprykład, pavieličeńnia chutkaści ŭdvaja, — ale i nie paharšajuć umovy taryfnych płanaŭ.

5. Zarobki.

Choć heta i nie tavar i nie pasłuha, ale zarobki — hałoŭnaje, što nie pavialičyłasia ŭ Biełarusi paśla devalvacyi. Adziny krok u hetym nakirunku — indeksacyja hrošaj dla biudžetnikaŭ. «Ažno» na 40 tysiač u miesiac (nie bolš za $8).

0

0

0

0

0

0

Jaŭhien Vasilkoŭ

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH