15 červienia stała viadoma, što na 43-m hodzie pajšła z žyćcia paetka i movaznaŭca Śviatłana Javar (Śviatłana Barysaŭna Sačanka), dačka viadomaha biełaruskaha piśmieńnika Barysa Sačanki.
Jaje znajšli ŭ svajoj kvatery miortvaj, ź vieršam, pryśviečanym baćkam.
***
Śviatłana Javar naradziłasia ŭ Miensku 11 lipienia 1968 hodu ŭ siamji viadomaha biełaruskaha piśmieńnika Barysa Sačanki. Skončyła filalahičny fakultet BDU i aśpiranturu Instytutu movaznaŭstva Akademii navuk Biełarusi. Pracavała ŭ roznych biełaruskich vydaviectvach, va Ŭniviersitecie kultury, Nacyjanalnym navukova-aśvietnickim centry imia F. Skaryny.
Vydała dźvie knihi paezii: “Bieły miesiac” i “Ranica ŭ tumanach”. 24 traŭnia jaje vierš hučaŭ u prahramie našaha radyjo "Vierš na svabodu". Dziesiać hadoŭ tamu jana była taksama aŭtarkaj adnajmiennaj prahramy i knihi.
Piaru Śviatłany Javar naležyć šerah navukovych daśledavańniaŭ i artykułaŭ u biełaruskim i zamiežnym druku, a taksama niavydadzienaja manahrafija pa tvorčaści znanaha piśmieńnika biełaruskaj emihracyi Masieja Siadniova.
Raźvitańnie sa Śviatłanaj Javar adbudziecca 17 červienia ŭ 15.30 u rytualnaj zali krematoryju na Paŭnočnych mohiłkach u Miensku.
***
Vierš na Svabodu, dasłany Śviatłanaj Javar 24 traŭnia 2011 hodu:
- Tut blaknie ŭsio, luby ahoń zhasaje…
A ŭ nieprahladnaj ciemry ty adzin.
Usio jak byccam by ŭnutry źmiarzaje,
I lepšaje ŭ tabie idzie na zhin.
- Ty rviešsia preč – tudy, dzie źziajuć zorki,
Dzie miesca jość nadziei i viaśnie,
Dy nie puskaje los tvoj, vielmi horki,
Da tych svabod, što bačyš tolki ŭ śnie.
- Zdajecca, palacieła b chutkaj ptuškaj
Adsiul u bok žyćcia, dy nie puskaje štoś
Na volu. Kolki maru ty ni huškaj,
Zaŭsiody pieraškodaj niešta jość.
- I lubiš ty radzimu, i nia chočaš
Svoj rodny kraj pakinuć nazaŭždy,
I za hadzińnikam panyła sočyš:
Ci pryjdzie ž vyzvaleńnie, sapraŭdy?
