Aficyjna apublikavany śpis asob i kampanij, u dačynieńni da jakich uviedzieny sankcyi ES

Aficyjny časopis Jeŭrapiejskaha sajuza apublikavaŭ śpisy biełaruskich hramadzian i kampanij, u dačynieńni da jakich Saviet ES uvioŭ 20 červienia sankcyi. U śpisie asob, na jakich raspaŭsiudžvajucca sankcyi, značacca:

Andrej Kažeŭnikaŭ,prakuror pa spravie ŭ dačynieńni da eks-kandydataŭ u prezidenty Uładzimira Niaklajeva, Vitala Rymašeŭskaha, členaŭ vybarčaj kamandy Niaklajeva Andreja Dźmitryjeva, Alaksandra Fiaduty i Sierhieja Vaźniaka, a taksama namieśnika staršyni niezarehistravanaha «Maładoha frontu» Anastasii Pałažanki. «Vidavočna, što vystaŭlenaje im abvinavačańnie było palityčna matyvavanaje i parušała Kryminalna-pracesualny kodeks. Jano hruntavałasia na niapravilnaj traktoŭcy padziej 19 śniežnia 2010 hoda, nie padmacavanaj śviedčańniami, dokazami i pakazańniami śviedak», — havorycca ŭ kamientaryi ES;

Ludmiła Hračova, sudździa suda Leninskaha rajona Minska. «Jana razhladała spravu eks-kandydataŭ u prezidenty Mikałaja Statkieviča i Dźmitryja Usa, a taksama palityčnych i hramadskich aktyvistaŭ Andreja Paźniaka, Alaksandra Kłaskoŭskaha, Alaksandra Kviatkieviča, Arcioma Hrybkova i Dźmitryja Bułanava. Vidavočna, što jaje maniera viadzieńnia pracesu supiarečyła Kryminalna-pracesualnamu kodeksu. Jana paličyła, što vykarystańnie dokazaŭ i pakazańniaŭ nie maje dačynieńnia da abvinavačanych asob», — zaznačaje ES;

Kirył Čubkaviec, prakuror pa spravie eks-kandydataŭ u prezidenty Mikałaja Statkieviča i Dźmitryja Usa, a taksama palityčnych i hramadskich aktyvistaŭ Andreja Paźniaka, Alaksandra Kłaskoŭskaha, Alaksandra Kviatkieviča, Arcioma Hrybkova i Dźmitryja Bułanava. «Vidavočna, što vystaŭlenaje im abvinavačańnie było palityčna matyvavanaje i parušała Kryminalna-pracesualny kodeks. Jano hruntavałasia na niapravilnaj traktoŭcy padziej 19 śniežnia 2010 hoda, nie padmacavanaj śviedčańniami, dokazami i pakazańniami śviedak», — havorycca ŭ kamientaryi;

Uładzimir Piefcijeŭ, biźniesmien. Jon fihuruje ŭ śpisie jak «asoba, źviazanaja z prezidentam Łukašenkam i jaho siamjoj». «Hałoŭny ekanamičny daradca prezidenta Łukašenki i klučavy finansavy sponsar režymu Łukašenki. Staršynia savieta akcyjanieraŭ „Biełtecheksparta“, najbujniejšaj u Biełarusi kampanii impartu-ekspartu ŭzbrajeńniaŭ», — adznačajuć u ES.

U śpisie kampanij, na jakija raspaŭsiudžvajucca sankcyi ES, — ZAT «Biełtechekspart», ZAT «Sport-pary» i PUP «BT Telekamunikacyi». Usie try arhanizacyi «padkantrolnyja Uładzimiru Piefcijevu», zaznačajecca ŭ dakumiencie.

Pryvodzicca taksama pieralik techniki, na pastaŭki jakoj u Biełaruś Jeŭrasajuz uvodzić embarha ŭ suviazi z tym, što jana moža vykarystoŭvacca ŭładami «dla represij». U hetym śpisie 11 punktaŭ.

Rašeńnie ab pašyreńni sankcyj było pryniata 20 červienia na siesii Savieta Jeŭrasajuza ŭ Luksiemburhu. U aficyjnym zaklučeńni savieta vykazana «hłybokaja zaniepakojenaść u suviazi z paharšeńniem situacyi z vykanańniem pravoŭ čałavieka, demakratyi i viaršenstva zakonu ŭ Biełarusi». ES zaklikaŭ Biełaruś pavažać uziatyja na siabie mižnarodnyja abaviazacielstvy.

Jeŭrasajuz «praciahvaje ŭvažlivaje sačyć za situacyjaj u Biełarusi». Raźvićcio dvuchbakovych adnosinaŭ «znachodzicca ŭ zaležnaści ad prahresu Biełarusi ŭ śfiery demakratyi, pravoŭ čałavieka i viaršenstva zakonu», padkreślivajecca ŭ zaklučeńni.

Palityčnaje rašeńnie pa Biełarusi było pryniata Savietam ES 31 studzienia ŭ Brusieli. Tady ministry zamiežnych spraŭ krain Jeŭrasajuza zaćvierdzili śpis biełaruskich čynoŭnikaŭ, adkaznych za parušeńni pravoŭ čałavieka padčas prezidenckaj kampanii. Hetym asobam zabaroniena naviedvać terytoryju ES, a ich rachunki i majomaść u krainach ES pavinny być zamarožany. Pieršapačatkova ŭ śpisie było 158 imionaŭ. Paźniej Saviet ES nieadnarazova pašyraŭ hety pieralik. Na siońnia ŭ im było 179 biełaruskich słužbovych asob, u tym liku Alaksandr Łukašenka.

0

0

0

0

0

0

Anton Taras, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH