U Biełarusi ŭ 2011 hodzie budzie praciahvacca praviadzieńnie žorstkaj biudžetnaj palityki. Pra heta havorycca ŭ matrycy reform, jakija ŭrad i Nacbank paabiacali realizavać dla atrymańnia kredytu Antykryzisnaha fondu JeŭrAzES u pamiery 3 młrd. dołaraŭ na praciahu dvuch z pałovaj hadoŭ.
U dakumiencie, tekst jakoha maje BiełaPAN, urad paviedamlaje ab pryniatym rašeńni abmiežavać deficyt biudžetu siektara dziaržkiravańnia da 1,5% da VUP u hetym hodzie z dalejšym skaračeńniem da 1% da VUP u 2013 hodzie.
U halinie padatkovaj palityki ŭrad realizoŭvaje miery biudžetnaj kansalidacyi dachodaŭ. U pryvatnaści, jon zabiaśpiečyć dadatkovaje zabirańnie dachodaŭ syravinnych halin, pavialičyŭšy ŭ pieršym paŭhodździ 2011 hoda staŭki ekspartnych pošlin na kalijnyja ŭhnajeńni (u 1,5 razu); u druhim paŭhodździ 2011 hoda — staŭki padatku na zdabyču kalijnaj soli (u 12 razoŭ) i syroj nafty (u 30 razoŭ).
U śfiery biudžetnaj palityki ŭrad realizuje miery ekanomii raschodaŭ. Zapłanavana, u pryvatnaści, što ŭ 2012—2013 hadach udzielnaja vaha zarpłaty rabotnikaŭ biudžetnaj śfiery ŭ ahulnym abjomie raschodaŭ kansalidavanaha biudžetu zastaniecca na ŭzroŭni 2011 hoda.
Praduhledžana taksama pavyšeńnie taryfaŭ na žyllova-kamunalnyja pasłuhi i pasłuhi pasažyrskaha transpartu.
U pryvatnaści, taryfy na ŽKP dla nasielnictva buduć paśladoŭna pavialičvacca da ŭzroŭniu, jaki zabiaśpiečvaje pakryćcio za košt srodkaŭ nasielnictva nie mienš jak 30% raschodaŭ na ich akazańnie ŭ 2011 hodzie, 35% — u 2012 hodzie, 40% — u 2013 hodzie. Pry hetym pakryćcio nasielnictvam raschodaŭ pa asobnych vidach žyllova-kamunalnych pasłuh, a taksama ich zvyšnarmatyŭnaha spažyvańnia budzie daviedziena da ŭzroŭniu ich sabiekoštu.
Taryfy na pasłuhi pasažyrskaha transpartu (haradskija i pryharadnyja pasažyrskija pieravozki aŭtamabilnym, haradskim elektryčnym, unutranym vodnym transpartam i mietrapalitenam) buduć paśladoŭna pavialičvacca da ŭzroŭniu, jaki zabiaśpiečvaje pakryćcio da kanca 2011 hoda 70% raschodaŭ na ich akazańnie. U 2012 hodzie ŭzrovień taryfaŭ na pasłuhi transpartu pavinien budzie pakryvać nie mienš jak 85% raschodaŭ na akazańnie takich pasłuh, u 2013-m — nie mienš jak 90%.
***
Pieršy tranš kredytu z Antykryzisnaha fondu JeŭrAzES u pamiery 800 młn. dołaraŭ ZŠA pastupiŭ u Biełaruś 21 červienia. Ahulny abjom kredytu składzie 3 młrd. dołaraŭ, pastupleńnie srodkaŭ budzie ažyćciaŭlacca tranšami na praciahu troch hadoŭ (2011—2013). Suma kredytu sioleta składzie 1,24 młrd. dołaraŭ. Astatnija srodki buduć vydzialacca roŭnymi tranšami dvojčy na hod na praciahu 2012—2013 hadoŭ.
Druhi i nastupnyja tranšy, kožny ŭ 440 młn. dołaraŭ, buduć pieraličvacca Biełarusi z vykanańniem joj uzhodnienych mier prahramy stabilizacyi płaciežnaha bałansu i pavyšeńnia kankurentazdolnaści ekanomiki, raspracavanaj uradam krainy.
Srodki kredytu pavinny być vykarystanyja na papaŭnieńnie mižnarodnych reziervovych aktyvaŭ i finansavańnie deficytu płaciežnaha bałansu Biełarusi.
