Tolki ŭ Minsku padčas akcyi maŭklivaha pratestu 3 lipienia zatrymanyja kala 200 čałaviek. Źviestak pra kolkaść zatrymanych pa krainie pakul niama.
«U Minsku było dźvie chvali zatrymańniaŭ: pieršaja — padčas parada, kali było zatrymana kala 70 čałaviek; druhaja — viečaram kala čyhunačnaha vakzała, dzie zatrymali jašče prykładna 100 čałaviek», — paviedamiŭ BiełaPAN pravaabaronca Valancin Stefanovič.
Pavodle jaho infarmacyi, u Frunzienskim RUUS Minska ŭžo aformili kala 50 administracyjnych pratakołaŭ, zatrymanych pavieźli ŭ Centr izalacyi pravaparušalnikaŭ na Akreścina. Usie jany abvinavačvajucca ŭ drobnym chulihanstvie (art. 17.1 KoAP). Sudy nad zatrymanymi, u tym liku nad žurnalistam «Jeŭraradyjo» Paŭłam Śviardłovym, pavinny prajści 4 lipienia.
Kali padčas parada z udziełam vyšejšaha kiraŭnictva krainy zatrymańni pravodzilisia cicha i nieprykmietna, to ludziej, jakija sabralisia ŭ rajonie Pryvakzalnaj płoščy, razhaniali i zatrymlivali z prymianieńniem hrubaj siły. Ludzi ŭ cyvilnym nakidvalisia ŭ asnoŭnym na moładź, ich ciahnuli pa asfalcie, załomvajučy ruki, niekatorych bili. Heta vyklikała niehatyŭnuju reakcyju prachožych, u tym liku sastarełych ludziej. Upieršyniu suprać udzielnikaŭ akcyi maŭklivaha pratestu prymianili haz.
