Protajarej Ihar Prylepski słužyć u chramie sv. Apostałaŭ Piatra i Paŭła ŭ vioscy Kasuta Vialejskaha rajonu, jon šmatdzietny baćka. Jak i ŭsim biełaruskim mužčynam, jamu pryjšła pozva — źjavicca ŭ milicyju, kab prajści daktyłaskapiju.
Ale śviatar admoviŭsia ad daktyłaskapii. Tady jamu prysudzili štraf — 700 000 rub. pavodle artykułu 23.4 Kodeksu ab administratyŭnych pravaparušeńniach z farmuloŭkaju «niepadparadkavańnie zakonnamu patrabavańniu pracaŭnikam pravaachoŭnych orhanaŭ». Jak patłumačyła jurystka Śviatłana Šłoma, hety artykuł užyvajuć da ŭsich, chto admaŭlajecca ad daktyłaskapii. «Pavodle zakonu vajennaabaviazany čałaviek musić adkatać palcy, ale kali jon admovicca, to nijakaha pakarańnia za heta ŭ zakonie nie prapisana. Spačatku hramadzianie hetym karystalisia, ale paśla milicyjanty pačali šukać vyjście — i znajšli jaho ŭ «niepadparadkavańni zakonnym patrabavańniam», — kaža ekśpiert.
Sam śviatar hetak tłumačyć situacyju: «Nakolki mnie viadoma (tak było i ŭ maim vypadku), pry zvarocie da ludziej pracaŭniki milicyi kažuć, što daktyłaskapija abaviazkovaja dla ŭsich — zakonu, miakka kažučy, heta nie adpaviadaje. Na sudzie ja zhadaŭ pra hety fakt jak pra naŭprostavy padman i atrymaŭ tłumačeńnie, pavodle jakoha pracaŭniki milicyi vykonvajuć unutranaje rasparadžeńnie Ministerstva ŭnutranych spravaŭ, i, takim čynam, padmanu tut niama. Vymušany pahadzicca — padmanu niama, ale jość sproba padparadkavać čałavieka, jaki nie słužyć u MUS, unutranamu rasparadžeńniu hetaj instancyi, što, naturalna, nijakim zakonam nie moža być padtrymana.
U suviazi z hetym uźnikaje pytańnie: čamu pry zvarocie da mianie, hramadzianina Respubliki Biełaruś (i nie tolki da mianie), z prapanovaju zdać adbitki palcaŭ pracaŭnik milicyi spasyłajecca nie na adpaviedny Zakon RB, a na ŭnutranaje rasparadžeńnie MUS, i kaža pry hetym, što ŭ nas ździejśnienyja terakty (majučy na ŭvazie padziei ŭ Minsku padčas śviata na Kastryčnickaj płoščy) dy inšyja złačynstvy? Ja trapiŭ u śpis padazravanych? Ale dzie ž tady prezumpcyja nievinavataści? Vybačajcie, ale taki padychod da spravy — nie što inšaje, jak prynižeńnie maich čałaviečych honaru i hodnaści».
Na siońnia, jak kažuć ekśpierty, zastaŭsia tolki adzin lehalny sposab adterminavać daktyłaskapiju — patrabavać pravodzić jaje na elektronnym abstalavańni. U Biełarusi ŭsiaho para takich aparataŭ, čarha na jaho raściahnułasia niekalki miesiacaŭ. Tak što pravaachoŭniki chutčej admoviacca ad pracedury, čym buduć damaŭlacca dastavić aparat.
