Miadźviedzieŭ prapanuje Ukrainie i Biełarusi razam adznačyć 1150-hodździe rasijskaj dziaržaŭnaści 66

Prezident RF Dźmitryj Miadźviedzieŭ prapanuje Ukrainie i Biełarusi razam z Rasijaj adznačyć u 2012 hodzie 1150-hodździe rasijskaj dziaržaŭnaści.

Ab hetym jon zajaviŭ, vystupajučy 22 lipienia va Uładzimiry na sumiesnym pasiadžeńni prezidyumaŭ savieta pa kultury i mastactvu i savieta pa navucy, technałohijach i adukacyi pry prezidencie RF, paviedamlaje BiełaPAN.

«Ja liču, što my całkam mahli b adznačyć hetuju padzieju razam z našymi blizkimi krainami, ja maju na ŭvazie, pierš za ŭsio, Ukrainu i Biełaruś. U nas ahulnyja histaryčnyja i duchoŭnyja karani. I 2012 hod, jon źjaŭlajecca važnym hodam nie tolki dla našaj krainy, tym bolš što dziaržaŭnaść naša, u adpaviednaści z kananičnaj teoryjaj, raspaŭsiudžvałasia, što nazyvajecca, z poŭnačy — paŭnočnaha-zachadu na poŭdzień, i ŭ hetym sensie my zacikaŭlenyja, kab našy partniory pryniali taksama va ŭsim hetym udzieł «, — cytuje Miadźviedzieva ahienctva «RIA novosti».

* * *

1150-hadovym «jubilejem rasijskaj dziaržaŭnaści» padziei 862 hoda možna nazvać vielmi apasrodkavana — nastolki dalokija jany ad siońniašnich hieapalityčnych realij. Z takim samym pośpiecham možna ličyć uzrost francuzskaj dziaržavy ad 413 hoda, kali było zasnavanaje Karaleŭstva burhundaŭ.

Pavodle «Apovieści minułych hadoŭ», u 862 hodzie naŭharodski starasta Hastamysł inicyjavaŭ zaprašeńnie varažskaha konunha (pravadyra) Ruryka kniaziem u Noŭharad, bo «ziamla ŭ nas bahataja, a paradku niama». Paśla Rurykavičy zrabili centram svajoj vołaści Kijeŭ. Kali ŭvarvalisia manhoła-tatary, «pierajemnicaj» Kijeva, zhodna z savieckaj jašče histaryčnaj daktrynaj, stała Uładzimira-Suzdalskaja Ruś, centram jakoj pastupova zrabiłasia Maskva. Ale až da XV stahodździa jaje liderstva było pad pytańniem — na jaho pretendavała, naprykład, Ćvier. Tolki ŭ časy Ivana III Kality Maskovija pačała ŭzmacniacca, za Ivanam IV jana źniščyła Naŭharodskuju respubliku, a za Piatrom I, u 1721 h., aficyjna stała zvacca Rasijaj.

SM

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH