U pačatku tydnia hałoŭnym treneram FK «Homiel» byŭ pryznačany daśviedčany specyjalist Anatol Jurevič, jaki jašče ŭ 1996 hodzie pryvioŭ da čempijonstva ŭ biełaruskim pieršynstvie mazyrski MVKC. Takim čynam «Homiel» staŭ šostym klubam vyšejšaj lihi, u jakim u mižsezońni źmianiŭsia hałoŭny trener. Taksama pakul nie zaćvierdžany «koŭč» haradzienskaha «Niomanu», i zusim nia fakt, što hetuju pasadu zachavaje ciapierašni trener Uładzimier Kurnieŭ.
Futbolnaja zima ŭ Biełarusi była taksama prykmietnaja viartańniem kolišnich hałoŭnych treneraŭ nacyjanalnaj zbornaj Eduarda Małafiejeva i Anatola Bajdačnaha. Małafiejeŭ viarnuŭsia ŭ Biełaruś paśla niaŭdałaha vajažu ŭ Šatlandyju, dzie jon pracavaŭ ź miascovym «Chartsam», jaki naležyć litoŭskamu miljaneru Ŭładzimieru Ramanavu. Ciapier Eduard Małafiejeŭ budzie treniravać inšy klub z chołdynhu Ramanava ‑‑ mienski MTZ‑RIPA.
Bajdačny ŭ svaju čarhu ŭznačaliŭ nia samuju mocnuju, ale dosyć ambicyjnuju ždanovickuju «Darydu», zamianiŭšy na hetaj pasadzie šmatvopytnaha Ludasa Rumbucisa.
U bieraściejskaje «Dynama» zamiest Siarhieja Baroŭskaha pryjšoŭ Uładzimier Havarkian, a ŭ žodzinskim «Tarpeda» Aleh Kubaraŭ zamianiŭ Uładzimiera Žuraŭla.
Nikoha ŭžo nia dziviać źmieny na trenerskim mościku mienskaha «Dynama». Za 7 hadoŭ dyrektarstva biznesoŭca Jurja Čyža ŭ kamandzie źmianiajecca 15 trener. Na hety raz vyvodzić «Dynama» na pole budzie były napadnik kamandy i nacyjanalnaj zbornaj Biełarusi Piotar Kačura. Zaŭziatary iranizujuć, ci zmoža jon pratrymacca na pasadzie choć da pačatku leta.
Na ahulnym fonie stabilnaściu ŭ vyšejšaj lizie vyłučajucca chiba tolki barysaŭski BATE i salihorski «Šachtar». Nia dziŭna, što mienavita hetyja kamandy apošnimi hadami stabilna zavajovajuć medali nacyjanalnaha čempijanatu.
