Natalla Radzina, redaktarka sajta Chartyja'97, raskryła ŭsie padrabiaznaści svaich uciokaŭ ź Biełarusi.
«Moj šlach u Jeŭropu doŭžyŭsia roŭna 4 miesiacy, — piša jana. — Taki praciahły šlach tłumačycca prosta — u turmie KDB mnie nie viarnuli pašpart. Choć heta zusim niezakonna — pry vyzvaleńni pad padpisku ab niavyjeździe da suda abvinavačvanamu abaviazany viarnuć jaho dakumienty».
Sieŭšy ŭ noč z 30 sakavika na 1 krasavika na ciahnik«Brest-Minsk» , kab jechać na dopyt u Minsk, Natalla Radzina vyjšła ŭ Łunincy i źjechała na mašynie, u jakoj jaje čakali siabry, u Maskvu.
«1 krasavika ja ŭžo była za miežami Biełarusi i vielmi rada, što zmahła takim čynam pavinšavać biełaruskich čekistaŭ ź ich prafiesijnym śviatam», — piša Natalla.
U Rasii jana źviarnułasia pa dapamohu va Upraŭleńnie viarchoŭnaha kamisaryjata AAN pa spravach uciekačoŭ u RF. Prachodžańnie praceduraŭ zaniało niekalki miesiacaŭ.
U Maskvie jana chavałasia na kvatery siabroŭ. Bajałasia, što jaje mohuć vykraści i vyvieźci nazad u Biełaruś biełaruskija śpiecsłužby. Joj dapamahali rasijskija pravaabaroncy.
«Paśla pryznańnia mianie ŭciekačom pa linii AAN, pieršaj dziaržavaj, jakoje akazała mnie mižnarodnuju padtrymku, stali Niderłandy. 28 lipienia, paśla afarmleńnia prajaznych dakumientaŭ, ja vylacieła z Maskvy ŭ Amsterdam.
Ja vielmi ŭdziačnaja Niderłandam za svajo vyratavańnie, ale praz try dni źjechała ŭ Litvu. Paśla prezidenckich vybaraŭ sajt charter97.org byŭ zarehistravany ŭ hetaj krainie, tut znachodzicca moj kalektyŭ, i paŭnavartasna vykonvać svaje funkcyi redaktara ja mahu siońnia tolki ŭ Vilni. 4 žniŭnia ja paprasiła palityčnaha prytułku ŭ Litvie», —raskazvaje Natalla Radzina pra svoj ciapierašni stan.
«Za ŭsie hetyja miesiacy ja na svajoj skury pakaštavała, što takoje być uciekačom. I mahu ščyra skazać — zajzdrościć niama čamu. Ja nikoli b nie źjechała ź Biełarusi, kali b, jak śpiavaŭ Vysocki, nie „abkłali“ z usich bakoŭ. Tamu pryjšłosia adkazvać, jak ja liču patrebnym. Hulać pa praviłach, jakija siońnia ŭstalavaŭ u Biełarusi KDB, ja nie źbirajusia. Zackavana mčacca na streł nie ŭ maim charaktary, i tamu „pasprabavała praz zabaronu“.
Upeŭniena, što na radzimu ja viarnusia vielmi chutka, i moj biełaruski pašpart mnie viernuć novyja demakratyčnyja ŭłady krainy», — zaviaršaje jana.
