Jana znachodzicca na terytoryi byłoj vajennaj častki ŭ vioscy Kuplin Pružanskaha rajona.
Sustaršynia arhkamiteta pa stvareńni partyi «Biełaruskaja chryścijanskaja demakratyja» Pavieł Sieviaryniec, asudžany na try hady abmiežavańnia voli, budzie pracavać u fiermierskaj haspadarcy. Pavodle jaho słoŭ, fiermierskaja haspadarka znachodzicca na terytoryi byłoj vajennaj častki ŭ vioscy Kuplin Pružanskaha rajona (Bresckaja vobłaść). «Heta fiermierskaja haspadarka «Bardo». Mianie tudy vyznačyli pracavać pa zahadzie z speckamendatury. Pakul maje abaviazki nie vyznačany. Usio budzie viadoma 19 žniŭnia», — adznačyŭ Sieviaryniec.
Fiermierskaja haspadarka «Bardo» była stvorana 30 krasavika 2003 h. Zajmajecca vyroščvańniem bulby, kapusty, burakoŭ, morkvy, zbožžavych (jačmień, pšanica), aptovym i roźničnaha handlem sielskahaspadarčaj pradukcyjaj, zapčastkami da sielhasmašyn, restaŭravanaj i novaj technikaj, rybavodstvam i rybałoŭstvam.
Sieviaryniec adznačyŭ, što da hetaha času «nie bačyŭ aficyjna padpisanaha dazvołu na naviedvańnie carkvy». Jon paviedamiŭ, što napisaŭ zajavu z prośbaj na naviedvańnie carkvy kožnuju niadzielu. Bližejšaja carkva znachodzicca ŭ Pružanach.
Nahadajem, 16 maja Pavieł Sieviaryniec, jaki padčas vybaraŭ 2010 hoda kiravaŭ vybarčym štabam kandydata ŭ prezidenty Vitala Rymašeŭskaha, byŭ asudžany sudom Zavodskaha rajona Minska pa č. 1 art. 342 KK (arhanizacyja i padrychtoŭka dziejańniaŭ, jakija hruba parušajuć hramadski paradak, abo aktyŭny ŭdzieł u ich). Dadzieny artykuł praduhledžvaje pakarańnie ŭ vyhladzie pazbaŭleńnia voli da troch hadoŭ. Sieviarynca prysudzili da troch hadoŭ abmiežavańnia voli z nakiravańniem va ŭstanovu adkrytaha typu.
Hladzi jašče: Sieviaryniec. Pieršy dzień «chimii» — fotarepartaž
