24 žniŭnia supracoŭniki pahraničnaha punkta «Pryvałka» (Hrodzienskaja vobłaść) admovilisia ŭpuścić u Biełaruś hrupu karespandentaŭ Litoŭskaha telebačańnia (LTV).
Jak paviedamlaje infarmacyjny partał Delfi, karespandentka telepieradačy «Panarama» Ruta Łankininkajte na miažy daviedałasia, što źjaŭlajecca niepažadanaj u Biełarusi asobaj i jaje viza anulujecca. Łankininkajte nakiroŭvałasia ŭ Hrodna dla padrychtoŭki materyjału pra žyćcio biełarusaŭ va ŭmovach abiasceńvańnia valuty.
«Na Rajhardskim pahraničnym pastu ŭsio było dobra, a na prapusknym pastu ŭ Pryvałcy pamiežnik skazaŭ, što ja, jak žurnalist, źjaŭlajusia niepažadanaj asobaj u hetaj krainie — piersona non hrata. Jon skazaŭ, što maja viza anulujecca, choć akredytacyja dziejnaja. Vyśviatlać situacyju paraiŭ u Minsku. Zastavałasia tolki paviarnuć nazad», — raskazała žurnalistka.
Pra incydent na miažy jana prainfarmavała pasolstva Litvy ŭ Biełarusi.
«Škaduju, što Biełaruś zusim izalavałasia, zakryła miežy. U hetym vypadku niama nivodnaha žurnalista (litoŭskaha. — BiełaPAN.) ź dziejnaj akredytacyjaj u hetaj krainie.
Alaksandr Łukašenka adharadziŭsia ad śvietu i Litvy, kab nichto nie daviedaŭsia, što adbyvajecca ŭ krainie»,— prakamientavała Łankininkajte.
Jana adznačyła, što pracuje ŭ Biełarusi pryblizna šeść hadoŭ. Štohod hod jana i apieratar Jonas Hryškonis atrymlivali słužbovyja vizy i hadavyja akredytacyi, jakija dazvalajuć naviedvać Biełaruś. «Napeŭna, my adzinyja paviedamlali pra toje, što adbyvajecca ŭ hetaj krainie. Nie raz nas zatrymlivali, nas bili, i kamieru raźbivali», — skazała žurnalistka.
Łankininkajte vykazała mierkavańnie, što čašu ciarpieńnia biełaruskich słužbaŭ biaśpieki pierapoŭnili apošnija mitynhi, na jakich prysutničała ich zdymačnaja hrupa.
Jak paviedamiŭ BiełaPAN kiraŭnik adździeła pa suviaziach z presaj i hramadskaściu Ministerstva zamiežnych spraŭ Litvy Mindaŭhas Łašas, dla rastłumačeńniaŭ u suviazi ź incydentam u MZS vyklikany Uładzimir Dražyn, pasoł Biełarusi ŭ Vilniusie. Čakajecca, što sustreča ź im adbudziecca najbližejšym časam.
