U minułuju piatnicu było padpisana biełaruska‑rasiejskaje mižuradavaje pahadnieńnie, zhodna ź jakim usia rasiejskaja nafta, jakaja pradajecca ŭ Biełaruś, budzie abkładacca ekspartnym mytam u pamiery 53 dalary za tonu. Jak aceńvajuć biełaruskija ekanamisty ŭpłyŭ novych koštaŭ nafty na ekanomiku?
Pavodle mienskaha ekanamista Leanida Zaiki, u minułym hodzie nafta ŭ Biełaruś pradavałasia ŭ siarednim pa canie 270 dalaraŭ za tonu, takim čynam sioleta jana padaražeje na 20 adsotkaŭ, nahruzka na ekanomiku vyraście na 1 miljard dalaraŭ.
Zaika: «U pryncypie heta moža skaracić biudžetnyja patoki. Ale jašče ciarpima, asabliva ŭličvajučy, što ŭ nas za niezaležnaść nichto nie pakutavaŭ, jak litoŭcy, jakija za svoj suverenitet siadzieli ŭ chałodnych kvaterach».
Eks‑staršynia Nacbanku Biełarusi Stanisłaŭ Bahdankievič ŭ suviazi z padaražańniem nafty prahnazuje rost cen, pierš za ŭsio na benzin:
Bahdankievič: «Biezumoŭna, hetyja 53 dalara na tonie treba budzie pierakryvać. Rost cenaŭ budzie i, akramia taho, buduć niedapastupleńni ŭ biudžet. Heta taksama paŭpłyvaje na našu ekanomiku, ułady mohuć pavialičvać pastupleńni ŭ biudžet, padvyšajučy košty na benzin i mazut».
Ale spadar Bahdankievič prahnazuje, što asabliva nehatyŭna novyja košty na naftu i haz paŭpłyvajuć tolki naprykancy hetaha hoda i ŭ nastupnym, bo pakul u dziaržavy jość rezervy, naprykład, praficyt biudžetu za minuły hod u pamiery adnaho miljarda dalaraŭ. Tym nie mieniej Stanisłaŭ Bahdankievič prahnazuje devalvacyju nacyjanalnaj valuty:
Bahdankievič: «Dumaju, što jana budzie davoli chutka. Rubiel budzie devalvavany. Moža być, navat u studzieni miesiacy. Budzie inflacyja pracentaŭ 12–15 za hod, moža i bolej. Padzieńnie abmiennaha kursu rubla adnosna dalara, vidać, budzie: ad 2140 dojdziem da 2500, a potym i da 3000».
Pavodle infarmacyi Stanisłava Bahdankieviča, za čas peŭnaj paniki biełaruskich układčykaŭ u kancy minułaha hodu rezervy Nacbanku byli źmienšanyja bolš čym na 200 miljonaŭ dalaraŭ. U cełym ža spadar Bahdankievič miarkuje, što tut šmat budzie zaležać ad dziejnaści ŭradu i Nacbanku, ad taho, jakija amartyzacyjnyja zachady jany buduć vykarystoŭvać.
Tym časam vice‑premjer biełaruskaha ŭradu Andrej Kabiakoŭ zajaŭlaje, što ŭrad źbirajecca ŭtrymać inflacyju ŭ vyznačanych ramkach:
Kabiakoŭ: «Jakoha‑niebudź niezaplanavanaha rostu, nieadpaviednaha prahnozu sacyjalna‑ekanamičnaha raźvićcia krainy, nia budzie. Usio budzie ŭ ramkach prahnozu. Urad zajaviŭ u prahnozie, što inflacyja budzie 7–9 adsotkaŭ za hod. Voś u hetyja parametry my pavinny ŭvajści. A što dla taho, jakija rehulujemyja ceny papravić z punktu hledžańnia, kab ekanomika pracavała, to takija rašeńni buduć prymacca»
