Kalehija Ministerstva justycyi Biełarusi zaćvierdziła rašeńnie kvalifikacyjnaj kamisii pa pytańniach advakackaj dziejnaści spynić licenziju advakatu Tamary Sidarency.
Aficyjnyja padstavy spynieńnia dziejańnia licenzii pakul nie viadomyja.
17 žniŭnia 2011 hoda advakat Sidarenka pavinna była prachodzić pazačarhovuju atestacyju. Adnak, nie čakajučy vynikaŭ pracy atestacyjnaj kamisii, kvalifikacyjnaja kamisija Ministerstva justycyi pryniała rašeńnie spynić dziejańnie jaje licenzii.
Na pracesie pa spravie 19 śniežnia Sidarenka abaraniała byłoha kandydata ŭ prezidenty Uładzimira Niaklajeva. A paśla taho jak Miniust pazbaviŭ licenzii Aleha Ahiejeva, taksama abaraniała inšaha byłoha kandydata — Alesia Michaleviča.
Tamara Sidarenka skazała: «Što tut kamientavać? Škada, viadoma. Škada siabie, škada kvalifikacyjnuju kamisiju, jakaja pieršaj prymała takoje rašeńnie, škada kalehiju. U mianie byli nadziei na toje, što ŭsio pavierniecca ŭ lepšy bok. Bo za mianie chadajničaŭ prezidyum našaj kalehii advakataŭ, u mianie 33 hady stažu, da taho ja nie była ni ŭ čym drennym zaŭvažana, za apošni čas maju čatyry adznaki, u tym liku dźvie hramaty Miniusta... Ja mierkavała, što ŭ lubym vypadku asobu musiać uličyć, ale... nie atrymałasia».
Tamara Sidarenka nie stała naŭprost źviazvać pazbaŭleńnie licenzii z tym, što apošnija niekalki hadoŭ jana časta abaraniała apazicyjanieraŭ. Jana nahadała, što atrymała dva papiaredžańni, jakija stali farmalnaj pryčynaj pretenzij da jaje.
«Pieršaje papiaredžańnie — kali ja dała intervju i vykazała mierkavańnie, što Niaklajeva pieraśledujuć metanakiravana. Pryznaju, što heta było skazana nie zusim pravilna. Ale zaŭvažu, što druhoje papiaredžańnie ja atrymała, kali paśla pieršaha papiaredžańnia byli pravieranyja maje spravazdačnyja dakumienty. Pad hetuju pravierku ja trapiła razam ź inšymi advakatami viadomych viaźniaŭ. Tamu miarkujcie sami».
Tamara Sidarenka skazała, što pasprabuje abskardzić rašeńnie kalehii Miniusta ŭ sudzie.
