Žychar horadu Siarhiej Aŭčyńnikaŭ byŭ zatrymany ŭviečary 21 vieraśnia, kali raspaŭsiudžvaŭ materyjały pra «Narodny schod».
A 17:00 jon razdavaŭ ulotki na vulicy 50 hod UŁKSM, kala AAT «558 avijacyjny ramontny zavod». Niečakana da jaho padyšoŭ čałaviek i zapatrabavaŭ adyści ad pradpryjemstva i raspaŭsiudžvać materyjały bližej da aŭtobusnaha prypynku. «Praź niekalki chvilin, jak ja adyšoŭ, źjaviłasia mašyna milicyi, — kaža Siarhiej Aŭčyńnikaŭ. — Supracoŭnik avijazavoda, jaki mianie prahaniaŭ, machaŭ milicyi rukami, pakazvajučy ŭ moj bok».
Aŭčyńnikaŭ byŭ zatrymany i dastaŭleny ŭ pastarunak. «Tam nie viedali, što sa mnoj rabić, i zvanili ŭ Brest pa kansultacyju, — zhadvaje zatrymany. — U vobłaści im nazvali artykuł 23.34 KAAP pra parušeńnie paradku arhanizacyi praviadzieńnia masavaha mierapryjemstva ci pikietavańnia». Ranicaj Aŭčyńnikaŭ byŭ dastaŭleny z pastarunka ŭ sud, dzie jaho pakarali na 525 tysiač rubloŭ (15 bazavych).
«Štraf mnie prapanavali zapłacić adrazu, bo ŭ mianie byli z saboju 100 amierykanskich dołaraŭ, — raskazaŭ „IR“ Siarhiej Aŭčyńnikaŭ. — Ja nie pahadziŭsia mianiać valutu i skazaŭ, što zapłaču štraf paźniej. Tady ŭ mianie da času apłaty štrafu zabrali dałary, skłali na ich akt aryštu hrašovych srodkaŭ i pierapisali numar kupiury».
Heta pieršaje zatrymańnie ŭ Baranavičach aktyvistaŭ, jakija źbirajucca pravieści ŭ našym horadzie «Narodny schod».
