Siońnia na pasiedžańni Kamiteta mižnarodnych spravaŭ Bundestaha lider abjadnanych demakratyčnych sił Biełarusi Alaksandr Milinkievič vystupiŭ z krytykaj jeŭrapiejskaj palityki, skiravanaj na adnaŭleńnie kantaktaŭ z dyktaturaj Alaksandra Łukašenki.
Alaksandr Milinkievič adznačyŭ, što palityka palityčnaj izalacyi režyma z boku Jeŭropy nie paspryjała demakratyzacyi Biełarusi i nie mieła karyści dla biełaruskaha narodu. Palityk padkreśliŭ, što byŭ i zastajecca prychilnikam dyjałohu abjadnanaj Jeŭropy ź Biełaruśsiu, ale tolki pry abaviazkovaj ŭmovie – vykanańnia režymam šerahu krokaŭ na zbližeńnie, pieršymi ź jakich pavinny stać vyzvaleńnie ŭsich palitźniavolenych na čale z Alaksandram Kazulinym i svaboda presy.
‑ Viera častki jeŭrapiejskich palitykaŭ u toje, što Jeŭropa moža parazumiecca z Łukašenkam i dziakujučy hetamu damahčysia demakratyčnych źmienaŭ u Biełarusi jość naiŭnym i niebiaśpiečnym mierkavańniem. Usie kantakty ź Jeŭropaj Łukašienka budzie vykarystoŭvać tolki i vyklučna ŭ intaresach zachavańnia režymu asabistaj ułady. Jak pakazvaje praktyka, z Łukašenkam nielha razmaŭlać biez akreślivańnia jasnych umovaŭ dyjałohu. Palityka Jeŭropy pavinna być jaki nikoli ćviordaj – dyjałoh tolki ŭzamien za vykanańnie ŭmovaŭ, ale nijak nie naadvarot, — adznačyŭ pa vynikach pasiedžańnia Kamiteta mižnarodnych spravaŭ Bundestaha lider abjadnanych demakratyčnych sił Alaksandr Milinkievič.
Siońnia ž adbyłasia sustreča Alaksandra Milinkieviča z daradcami kanclerki Niamieččyny Anhieły Merkel. Byli abmierkavanyja prablemy enierhietyčnaj biaśpieki ŭ śviatle naftahazavaha kanflikta Biełarusi i Rasii, chada budučych sacyjalna‑ekanamičnych reformaŭ, padtrymka Biełarusi ŭ pierachodny pieryjad.
Uviečary adbuducca pieramovy Alaksandra Milinkieviča z kiraŭnictvam Chryścijanska‑demakratyčnaha sajuzu, kirujučaj partyj Niamieččyny.
