VNU mohuć zastacca bieź biełaruskaj movy. Dyscyplinu «Biełaruskaja mova: prafiesijnaja leksika» chočuć vyklučyć z prahramy navučańnia na niefiłałahičnych śpiecyjalnaściach. Ministerstva adukacyi raspracoŭvaje novyja standarty dla vyšejšych navučalnych ustanovaŭ.
Jak stała viadoma «Salidarnaści» z krynic, jaki zasłuhoŭvajuć davieru, u novych standartach dla VNU na niaprofilnych śpiecyjalnaściach moža adsutničać kurs «Biełaruskaja mova: prafiesijnaja leksika». Inšymi słovami, matematyki, fiziki i ŭsie astatnija śpiecyjalisty (za vyklučeńniem fiłołahaŭ), jakich rychtujuć u biełaruskich VNU, buduć pazbaŭlenyja mahčymaści vyvučać rodnuju movu.
Jak viadoma, u žniŭni Alaksandr Łukašenka zapatrabavaŭ skaracić termin navučańnia ŭ VNU na 25%.
«Nam treba vielmi surjozna razhladać pytańnie padrychtoŭki kadraŭ u krainie. Bajusia pamylicca, ale možna skazać, što prykładna na tracinu my vučym studentaŭ tamu, što potym absalutna nie spatrebicca ŭ žyćci», — zajaviŭ prezident na sustrečy ź ministram adukacyi.
Takimi voś «niepatrebnymi viedami», mabyć, i akazałasia biełaruskaja mova.
— Hetaja situacyja dla nas viadomaja, — zajaviŭ kiraŭnik Tavarystva biełaruskaj movy Aleh Trusaŭ. — Ministerstva adukacyi ŭžo niekalki razoŭ vykidała biełaruskuju movu z prahramy, a TBM jaje viartała nazad. My źviartalisia navat u Administracyju prezidenta i dabivalisia svajho. Kali i zaraz situacyja paŭtorycca, my budziem zmahacca za movu da kanca.
Na žal, atrymać aficyjny kamientar čynoŭnikaŭ nie ŭdałosia. U adździele vyšejšaj adukacyi Ministerstva zajavili tolki, što «ŭsio jašče znachodzicca ŭ stadyi raspracoŭki». Jaki los u novych standartach padrychtavali biełaruskaj movie, nie patłumačyli.
— Kali takoje zdarycca, daviadziecca pachavać našu movu, jakuju my ŭžo chavajem bolš jak 100 hadoŭ,— adznačyŭ zahadčyk kafiedry historyi biełaruskaj movy Biełaruskaha dziaržaŭnaha ŭniviersiteta, prafiesar Mikałaj Pryhodzič. — Ja byŭ adnym z tych, chto rychtavaŭ ciapierašniuju prahramu i dziejnyja standarty, pa jakich ŭžo čatyry hady vučacca studenty. Kali zaraz vyklučać biełaruskuju movu, heta adabjecca samym drennym čynam na ŭsich.
Što ž heta za śpiecyjalist, jaki žyvie ŭ Biełarusi, vučycca ŭ VNU i nie viedaje svajoj terminałohii i jaje historyi? Nichto ž nie stavić pytańnia, što ŭ Vjetnamie nie treba vyvučać vjetnamskuju movu, a ŭ Kitai kitajskuju. Atrymlivajecca poŭny absurd na ŭsich ŭzroŭniach.
Pavodle Mikałaja Pryhodziča, pakul vykładčyki pracujuć pa raniejšaj prahramie.
— U lubym vypadku dva hady my jašče pracujem jak jość, bo standarty dziejničajuć piać hadoŭ. Chacia ŭ nas u adzin momant mohuć usio pieraviarnuć, i ŭsie adrazu kinucca vykonvać. Ale my nastrojenyja dabivacca navat, kab hety kurs byŭ nie adzin siemiestr, a dva. Kali ž pajšli takija razmovy pra vyklučeńnie, to pra heta treba kryčać na ŭsich skryžavańniach, inakš stracim movu kančatkova. Vidać, niekamu vielmi chočacca, kab biełarusy zastalisia biez movy.
