Ułada kančatkova hublaje kantrol nad situacyjaj u ekanomicy. Pra heta zajaviŭ lidarLibieralna-demakratyčnaj partyi Siarhiej Hajdukievič 17 listapada na pašyranym pasiadžeńni vyšejšaha savieta arhanizacyi.
Pavodle jaho słoŭ, «pieravažnaja bolšaść naroda Biełarusi ŭ adkrytuju asudžaje ŭładu, i hetuju praŭdu ŭtaić niemahčyma».
«Urad nie ŭ stanie skazać Łukašenku praŭdu, što ŭsie jaho daručeńni ŭ asnoŭnym nievykanalnyja biez realnych cyvilizavanych rynačnych mier i rekanstrukcyi ekanomiki ŭ cełym», — padkreśliŭ lidar ŁDP.
U takoj situacyi, ličyć Hajdukievič, chutka «padymuć hałovy realnyja pracoŭnyja kalektyvy i ŭvieś narod u cełym, bo dalej ciarpieć budzie niemahčyma». Pavodle jaho słoŭ, adstaŭkaj urada «pytańni nie vyrašyć ni ekanamičnyja, ni palityčnyja».
Hajdukievič zajaviŭ, što «siarod siaredniaha źviana ŭładnych čynoŭnikaŭ poŭnaja panika». «Sotni aniekdotaŭ pra ŭładu hulajuć pa našaj krainie — heta vielmi mocnyja simptomy ciažkaj chvaroby, što achapiła ekanomiku i ŭnutrypalityčnuju abstanoŭku ŭ krainie», — padkreśliŭ jon.
Pavodle słoŭ Hajdukieviča, chutka zakončycca farmiravańnie kaardynacyjnych savietaŭ inicyjavanaha ŁDP Narodnaha ruchu Biełarusi va ŭsich abłaściach i bujnych haradach krainy. «Siońnia my zajaŭlajem uładzie: prysłuchajciesia, my hatovy dziela dziaržavy i našych hramadzian havaryć i razam šukać vyjście, jakim by ciažkim jano ni było b. Potym budzie pozna», — padkreśliŭ jon.
Havoračy pra vybary ŭ Pałatu pradstaŭnikoŭ, Hajdukievič zajaviŭ, što ŁDP hatova sumiesna z Narodnym rucham Biełarusi vystavić 110 kandydataŭ u deputaty va ŭsie akruhi krainy. «Ale kali vybary buduć pravodzicca pa staroj schiemie — nijakich śpiektaklaŭ, nijakaha ŭdziełu. Usich da adnaho źnimiem, niachaj narod Biełarusi, Rasija i Jeŭrasajuz hladzić i robić vysnovy», — skazaŭ jon.
