Pra hatoŭnaść EZ pačać pieramovy pra pašyranaje pahadnieńnie z Ukrainaj było zajaŭlena ŭ zaklučeńniach pasiedžańnia Rady EZ pa ahulnych pytańniach i źniešnich adnosinach, što adbyłosia 22 studzienia ŭ Bruseli.
«Eŭraźviaz pryznaŭ eŭrapiejskija imknieńni Ŭkrainy», — staić u dakumencie. «U pryniatych 21 lutaha 2005 h. zaklučeńniach Rady EZ i Planie dziejańniaŭ EZ‑Ukraina Eŭraźviaz pavitaŭ eŭrapiejski vybar Ukrainy», — adznačajuć ministry dziaržavaŭ‑siabraŭ EZ. «EZ pryznaje i vitaje prahres, zrobleny Ŭkrainaj u spravie kansalidacyi demakratyi», — padkreślivajecca ŭ zaklučeńniach Rady.
Eŭraźviaz hatovy padtrymlivać palityčnyja i ekanamičnyja reformy ŭva Ŭkrainie. Z dapamohaj novaha pašyranaha pahadnieńnia «EZ imkniecca pabudavać jašče bolš blizkija stasunki z Ukrainaj, nakiravanyja na pastupovuju ekanamičnuju intehracyju i na pahłybleńnie palityčnaha supracoŭnictva», — padkreślivajecca ŭ dakumencie.
Razam z tym novaje pahadnieńnie «nie pradvyznačaje inšych šlachoŭ raźvićcia adnosinaŭ pamiž Ukrainaj i EZ, mahčymych u budučyni», — śćviardžajuć eŭrapiejskija ministry.
Rada EZ i Eŭrapiejskaja Kamisija nahadvajuć, što na śniežańskim samicie EZ było vyrašana jašče bolš «umacavać Eŭrapiejskuju palityku susiedztva dla kansalidacyi koła dabrabytu, stabilnaści i biaśpieki, jakoje zaćvierdžvajecca ŭ dziaržavach‑susiedziach EZ i zasnavanaje na pravach čałavieka, demakratyi i viaršenstvie zakona».
Rašeńnie pra pačatak pieramovaŭ nakont zaklučeńnia novaha pašyranaha pahadnieńnia pamiž EZ i Ŭkrainaj było pryniataje na chielsynskim samicie Ŭkraina‑EZ (27 kastryčnika 2006 h.). Pieramovy pavinny startavać na pačatku 2007 h.
Čakajecca, što novaje pahadnieńnie budzie achoplivać uvieś spektar adnosinaŭ pamiž bakami. U pryvatnaści, pahadnieńnie praduhledzić stvareńnie zony svabodnaha handlu pamiž Ukrainaj i EZ.
Na siońniašni dzień pamiž EZ i Ŭkrainaj dziejničaje Pahadnieńnie pra partniorstva i supracoŭnictva, termin dziejańnia jakoha skančvajecca ŭ 2008 h.
