Nacbał Dzianis Sachar aštrafavany na 1 młn rubloŭ 2

Aktyvist arhkamiteta pa stvareńni ŭ Biełarusi Nacyjanał-balšavickaj partyi Dzianis Sachar aštrafavany na 30 bazavych vieličyń (1 młn 50 tys rubloŭ).

Pra heta paviedamiŭ pradstaŭnik arhkamiteta Dźmitryj Siniak.

Pavodle jaho słoŭ, Sachar byŭ zatrymany supracoŭnikami milicyi 12 śniežnia prykładna ŭ 7.30 u siabie doma. Doŭhi čas jaho siabry nie viedali, dzie jon znachodzicca. Ni va UUS, ni ŭ sudzie Pieršamajskaha rajona Minska nie paćviardžali jaho zatrymańnie. Adnak jak stała viadoma, u Pieršamajskim sudzie ŭsio ž adbyŭsia praces, jaki zaviaršyŭsia štrafam dla Sachara za drobnaje chulihanstva.

Siniak źviazvaje zatrymańnie svajho tavaryša z akcyjaj nacyjanał-balšavikoŭ, praviedzienaj 3 śniežnia kala budynka Biełteleradyjokampanii na vulicy Makajonka ŭ Minsku.

Nahadajem, u hety dzień troje maładych ludziej vylili na hanak kala centralnaha ŭvachodu ŭ budynak viadro z łokšynaj i raskidali ŭlotki. Va ŭlotkach ad imia biełaruskich nacyjanał-balšavikoŭ havorycca, što «najpieršaja zadača žurnalista — harantavać ludziam atrymańnie praŭdzivaj infarmacyi šlacham adlustravańnia abjektyŭnaj rečaisnaści». Aŭtary ŭlotki nahadvajuć, što «pra heta abjaŭlaje pryncyp viernaści žurnalista abjektyŭnaj rečaisnaści, adzin ź mižnarodnych pryncypaŭ prafiesijnaj etyki žurnalista, pryniatych u Paryžy 20 listapada 1983 hoda».

«Na žal, žurnalistam i supracoŭnikam Biełteleradyjokampanii takija pryncypy nikoli nie byli znajomyja. Biełaruskaje telebačańnie zaŭsiody słaviłasia adkryta zamoŭlenymi, palityčna anhažavanymi repartažami, jakija vyklikajuć to śmiech, to ździŭleńnie. Niaŭmieły rebrendynh nazvaŭ telekanałaŭ nie źmianiŭ ich sutnaści. Paśla źmieny šyldy BT usio tak ža i zastałosia śfieryčnym telebačańniem u vakuumie. Ale chopić! Ješcie sami svaju łokšynu, my chočam atrymlivać praŭdzivuju infarmacyju pra abjektyŭnuju rečaisnaść!» — havorycca ŭ adoźvie da BT.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH