Jak paviedamiŭ zahadčyk adździeła mižnarodnych adnosin meryi Vilni Žylvinas Abaravičus, mer Vilni jašče ŭviesnu hetaha hoda źbiraŭsia naviedać Astraviec, dzie budujecca biełaruskaja AES.
Jaho zaprasiŭ tudy kiraŭnik Astravieckaha rajona Adam Kavalko padčas svajho vizitu ŭ Vilniu. U hetym rajonie žyvie vialikaja litoŭskaja dyjaspara, i Arturas Zuokas taksama chacieŭ sustrecca z suajčyńnikami.
Adnak, kali Zuokas staŭ źbiracca ź vizitam u Biełaruś,
ź im sustreŭsia pasoł Biełarusi ŭ Litvie Uładzimir Dražyn i staŭ uhavorvać nie jechać u Astraviec. Dypłamat klatvienna abiacaŭ, što letam u Astraŭcy budzie arhanizavana kanfierencyja sumiesna ź Minenierha Biełarusi pa pytańniach atamnaj enierhietyki, i mera abaviazkova na jaje zaprosiać. Adnak nijakaj kanfierencyi ŭ Astraŭcy tak i nie było praviedziena.
Narešcie, u listapadzie mer sabraŭsia jechać u biełaruski prymiežny pasiołak Hierviaty, kudy jaho zaprasiła miascovaja litoŭskaja hramada.
Ale
ŭ biełaruskim pasolstvie Arturasu Zuokasu admovili ŭ dziełavoj vizie dla naviedvańnia Biełarusi, skazaŭšy, što jamu nieabchodna zaprašeńnie ad aficyjnych uładaŭ. U vyniku mer padaŭ dakumienty na turystyčnuju vizu, ale navat nie atrymaŭ adkazu z ambasady.
Jak adznačyŭ zahadčyk adździeła mižnarodnych adnosin meryi Vilni Žylvinas Abaravičus, jon taksama padavaŭ dakumienty na vizu ŭ Biełaruś. U hetyja vychodnyja jon pavinien byŭ vystupać na kanfierencyi pa samakiravańni ŭ Minsku. Adnak i jamu było admoŭlena ŭ biełaruskaj vizie.
Nahadajem, što
21 kastryčnika mer Vilni sustreŭsia ź liderami biełaruskaj apazicyi i žonkami palityčnych źniavolenych.
Ź biełaruskaha boku na sustreču byli zaprošanyja pieršy kiraŭnik niezaležnaj Biełarusi Stanisłaŭ Šuškievič, žonki palitviaźniaŭ Źmitra Bandarenki i Mikałaja Statkieviča Volha Bandarenka i Maryna Adamovič, redaktar sajta charter97.org Natalla Radzina, były palitviazień Alaksandr Atroščankaŭ, kaardynatary hramadzianskaj kampanii «Jeŭrapiejskaja Biełaruś» Pavał Marynič i Jaŭhien Afnahiel, kiraŭnik Biełaruskaha Doma pravoŭ čałavieka ŭ Vilni Hanna Hierasimava, kiraŭnik Tavarystva biełaruskaj kultury Chviedar Niuńka, kiraŭnik Biełaruskaha palityčnaha pradstaŭnictva ŭ Litvie Aleh Miacielica, prarektar Jeŭrapiejskaha humanitarnaha ŭniviersiteta Alaksandr Kałbaska, kulturołah, historyk architektury Siarhiej Chareŭski, adzin z kiraŭnikoŭ telekanała «Biełsat» Eduard Mielnikaŭ i inšyja.
Arturasa Zuokasa, u pieršuju čarhu, cikaviła palityčnaja situacyja ŭ Biełarusi. Jon adznačyŭ, što toje, što adbyvajecca ŭ krainie pa susiedstvie ź Litvoj, nie źjaŭlajecca narmalnym i tatalnaje parušeńnie ŭ Biełarusi pravoŭ čałavieka vyklikaje niepakoj.
Palityk padrabiazna raspytaŭ ŭ prysutnych, ź jakimi prablemami siońnia sutykajucca biełaruskija demakratyčnyja aktyvisty. Asabliva jaho cikaviŭ los palityčnych źniavolenych Andreja Sańnikava, Źmitra Bandarenki, Mikałaja Statkieviča, Źmitra Daškieviča i inšych.
Zuokas zajaviŭ, što hatovy zrabić usio, što ŭ jaho ŭ siłach, kab pra situacyju ŭ Biełarusi jak maha bolš viedali ŭ Litvie, i kab litoŭskija palityki i biznesmeny byli bolš pryncypovyja ŭ dačynieńni da režymu Alaksandra Łukašenki.
