U intervju radyjostancyi «Russkaja słužba novostiej» (RSN) Alaksandr Łukašenka pryhadaŭ padziei hadavoj daŭniny.
Pavodle jaho słoŭ, vuličnyja biesparadki 19 śniežnia nie byli spravakavanyja ni Zachadam, ni Rasijaj.
«Nie rasijanie i nie Zachad tut tvaryli spravy. Heta peŭnyja dziejačy. Dvoje ź ich ciapier zastajucca pakul u turmie. Jany chočuć być hierojami — nu i niachaj, ničoha strašnaha», — skazaŭ Łukašenka, majučy na ŭvazie svaich kankurentaŭ na prezidenckich vybarach Andreja Sańnikava i Mikałaja Statkieviča.
Biełaruski kiraŭnik nie zhodnyja z tym, što hetyja palityki, znachodziačysia ŭ turmie, pieraškadžajuć jamu bolš, čym na voli (takoje mierkavańnie vykazaŭ kiraŭnik RSN Siarhiej Darenka).
«Jany mnie absalutna nijak — ni plus, ni minus. Jany dumajuć, što jany buduć takim čynam hierojami? Dobra. Chočacie hierojami być — daju vam takuju mahčymaść, budźcie. Ja nie liču, što jany takim čynam hierojami buduć, absalutna», — padkreśliŭ Łukašenka.
Jon u čarhovy raz zajaviŭ, što asabista kiravaŭ dziejańniami siłavikoŭ padčas padziej u Minsku 19 śniežnia: «19-ha ja addavaŭ naŭprost kamandy, jak dziejničać. Heta byli maje kamandy, heta nie siłaviki».
Pavodle słoŭ Łukašenki, jon nazyvaje biełaruskuju apazicyju piataj kałonaj, tamu što «apazicyja — heta štości hruntoŭnaje». «Ja sam z apazicyi pryjšoŭ da ŭłady», — nahadaŭ jon.
«Voś heta piataja kałona — heta 400 čałaviek.
U mianie śpisy lažać na stale, našy śpiecsłužby viedajuć kožnaha.Kali prapłacić i hetak dalej, jany mohuć sabrać 800, usio astatniaje — heta raziavaki», — ličyć kiraŭnik dziaržavy.
«Voś hetaja piataja kałona», pavodle mierkavańnia Łukašenki, i «padbuchtoryła ludziej» na «sacyjalnuju revalucyju» — «rabiaty pačali plaskać».
Łukašenka ličyć niebiaśpiečnym zachapleńnie ciapierašniaj moładzi — jak u Biełarusi, tak i ŭ Rasii — vuličnymi pratestami.
«Heta niebiaśpiečna. Z hetaha treba znachodzić vychad ciapier, tamu što hetyja trendavyja i modnyja rečy abaviazkova pierarastuć u štości bolšaje, kali nie znajści mahčymaści adreahavać», — skazaŭ jon.
«Nielha stvarać pryčyn dla taho, kab heta było modnym. My nie pavinny heta stvarać», — padkreśliŭ Łukašenka.