Rymašeŭski prapanoŭvaje Łukašenku scenar mirnaj pieradačy ŭłady abnoŭlena; dadaŭsia repartaž 115

Chryścijanskija demakraty vybrali sabie novy łozunh. Fota radyjo Svaboda.

Vital Rymašeŭski (źleva) i Dzianis Sadoŭski. Fota radyjo Svaboda.

Biełaruskaja chryścijanskaja demakratyja 17 śniežnia praviała ŭžo čaćviorty ŭstanoŭčy źjezd. Minułyja sproby skančalisia admovaj ab rehistracyi ad Ministerstva justycyi. Chadeki nie zdajucca — hnuć svaju liniju dalej.

Pamiaškańnie znoŭ było vybranaje DK MTZ.

Kiraŭnictvu BCHD niejak atrymałasia damovicca z upraŭlajučymi doma kultury, kab źniać čyrvona-zialony ściah.

Navuka inšym partyjam i arhanizacyjam.

U faje pamiaškańnia pradavali miod. Časovy pavierany ZŠA Majkł Skenłan navat nie ŭtrymaŭsia, kab nabyć zbanočak.

Źjaviłasia novaja raściažka «Narodnaja partyja z chryścijanskim sercam». A voś pa inšaj atrybutycy asablivaj roźnicy ad minułych źjezdaŭ nie było, zrešty, i nie musiła być.

Niazvykłaj była tolki adsutnaść Paŭła Sieviarynca. Jak viadoma,

ruchavik-stvaralnik BCHD ciapier adbyvaje pakarańnie «chimijaj» u Pružanskim rajonie.

Ad Sieviarynca byŭ zasłuchany videazvarot. Pavieł, siedziačy ŭ mašynie ŭ bieł-čyrvona-biełym šaliku, zaklikaŭ da bajkotu «poŭnamaštabnaha farsu», tak elehantna jon nazvaŭ parłamienckija vybary.

U padobnym klučy vystupaŭ i były kandydat u prezidenty Biełarusi Vital Rymašeŭski, jaki, siarod inšaha, prapanavaŭ Łukašenku mirny scenar pieradačy ŭłady.

Jon praduhledžvaje vyzvaleńnie palityčnych źniavolenych (u zale visieli partrety palitviaźniaŭ), praviadzieńnie svabodnych vybaraŭ i finansavuju dapamohu ad Jeŭropy dla vychadu z kryzisu.

Taksama Rymašeŭski daŭ tłumačeńnie svajmu listu, jaki jon napisaŭ ź SIZA KDB Alaksandru Łukašenku. Skazaŭ, što heta byŭ svojeasablivy kampramis. Siłaviki takim čynam dabivalisia, kab kandydat ad BCHD nazvaŭ Łukašenku prezidentam.

Nie abyšłosia i biez strataŭ. Ciapier u BCHD zastałosia try sustaršyni. Čaćviorty — Alaksiej Šein — paprasiŭ vyzvalić jaho ad hetaj pasady.

«Rašeńnie prymałasia ŭ malitvach», —

adznačyŭ Alaksiej.

U BCHD jon tym nie mienš zastajecca. Pra supiarečnaści Šeina ź niekatorymi kiraŭnikami BCHD havaryli jašče pierad vybarami, kali jon navat nie ŭvajšoŭ u davieranyja asoby kandydata ad svajoj partyi.

U astatnim źjezd prachodziŭ davoli apieratyŭna. Haračych dyskusij na im nie było. Vystupy byli karotkimi i intensiŭnymi. Hałoŭnaj metaj zastajecca rehistracyja, a nie ŭnutrypartyjnyja pytańni.

Padčas hałasavańnia pa sustaršyniach za Sieviarynca nie było nivodnaha hołasu suprać ci tych, chto ŭstrymaŭsia. Pa Dźmitruku — šaściora ŭstrymalisia. Dvoje byli suprać, a jašče šaściora ŭstrymalisia pa Rymašeŭskim.

Usiaho na źjeździe było 108 delehataŭ.

Było niamała haściej z-za miažy. Krychu trapiŭ u łužu pradstaŭnik Rasii, jaki niešta skazaŭ pra «sajuznuju dziaržavu». Delehatam toje nie spadabałasia. Byŭ eks-kandydat u prezidenty Dźmitryj Us, jakoha sustrakali doŭhimi apładysmientami. Us paprasiŭ dałučycca da jaho inicyjatyvy pa źmienie vybarčaha zakanadaŭstva.

A voś Alaksandr Milinkievič, Alaksiej Janukievič dy Juraś Hubarevič u hety dzień vyrašyli naviedać Paŭła Sieviarynca «na vysyłcy». Ciažka skazać, ci heta vyjšła vypadkova, ci nie.

U pierapynku źjezda prajšli sustrečy «Moładzi BCHD» (jaje sapraŭdy było niamała) dy «Piensijanieraŭ BCHD».

Skončyŭsia ž źjezd vystupam Lavona Volskaha — u ciemry, bo adrubili elektryčnaść.

Źmicier Pankaviec

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH