Sadysckaja pomsta Femen-istkam: vyvieźli ŭ les, raździeli, ździekavalisia abnaŭlajecca, anłajn ad kar. NN u Jelsku, dadalisia foty 305

Fota Jeŭraradyjo.

Fota BiełaPAN.

Fota BiełaPAN.

Fota BiełaPAN.

12.00

Aktyvistki Femen nie parušali biełaruskaje pahraničnaje zakanadaŭstva. Nijakich materyjałaŭ ab ich departacyi pahraničniki nie składali, paviedamiŭ pres-sakratar Dziaržaŭnaha pahraničnaha kamiteta Biełarusi Alaksandr Ciščanka.

Pavodle jaho słoŭ, materyjały na dziaŭčat nie składalisia, bo, jaki jany zajavili, nie pa svajoj voli, hvałtoŭna apynulisia biez dakumientaŭ u pamiežnaj zonie.

Ciščanka taksama paviedamiŭ, što paśla druhoj hadziny nočy aktyvistki Femen u prysutnaści konsuła Ukrainy ŭ Biełarusi byli pieradadzieny ŭkrainskim pahraničnikam u punkcie propusku «Novaja Rudnia». «U pracesie pieradačy nijakich skarhaŭ ad dziaŭčat nie pastupała», — skazaŭ jon.

9.00

U žyvym efiry Jeŭraradyjo aktyvistka arhanizacyi Ina Šaŭčenka (na pieršym zdymku ŭ centry) raskazała pra toje, što adbyvałasia ź dziaŭčatami paśla vykradańnia. Pavodle słovaŭ dziaŭčyny, a 7-j viečara ŭčora ich raptoŭna schapili ludzi ŭ čornym na minskim aŭtavakzale «Uschodni», kali jany čakali na płatformie aŭtobus na Homiel. I heta bačyli šmatlikija śviedki.

U srebnym mikraaŭtobusie z zakrytymi voknami ŭ ich adabrali ŭsie asabistyja rečy, dvoje nieviadomych ich dapytvali. Ich cikaviła, chto adpraviŭ dziaŭčat u Biełaruś, «chto apłočvaŭ akcyju», ci supracoŭničajuć jany ź biełaruskaj apazicyjaj, kaho viedajuć ź biełaruskich apazicyjanieraŭ. Vykradalniki pradstavilisia «milicyjaj», kaža Šaŭčenka. Adnak, kali dziaŭčaty paprasili ich advieści ŭ adździaleńnie, nieviadomyja adreahavali vielmi rezka, skazali, što jany buduć znachodzicca stolki, kolki zahadajuć.

Kala 6-j ranicy dziaŭčat pieraviali ŭ ciomny mikraaŭtobus.

Im źviazali ruki płastykavymi pieraviazkami, rassadzili na asobnyja siadzieńni, kala kožnaj byŭ čałaviek, jaki sačyŭ, kab nie padymali hałavu. «Kali ruchalisia, nas źbivali, nam pahražali, kazali, što heta apošnija hadziny našaha žyćcia. Što my adkažam za ŭsio, što zrabili», — raspaviadaje Šaŭčenka.

Prykładna praz 4 hadziny mašyna spyniłasia ŭ lesie.

Ich vyvieli, prymusili źniać vierchniuju vopratku, padniać płakaty z fašysckaj svastykaj, palivali zialonkaj, Inie abrezali vałasy. Paśla prymusili źniać nižniaje adzieńnie, źbivali pałkami. Usio heta zdymali na videa.

«Paśla zahadali apranucca, pahruzili ŭ aŭtobus i advieźli da miažy. Vykinuli ź jaho i skazali, što my možam pieššu dajści dadomu», — raskazała aktyvistka.

Jany błukali, paśla znajšli viosku Biaki,

ludzi im dapamahli, dali telefon, kab patelefanavać siabram.

«Ale i tam była niebiaśpieka, — kaža Ina. —

Kali znachodzilisia ŭ adnaho žychara pasiołka, jaki nam daŭ prytułak, niejki małady čałaviek pryjšoŭ, zalacaŭsia, sprabavaŭ nas zhvałcić…

Paśla milicyjanty pryjechali, skazali, što vyjechaŭ konsuł, sabrali nas u adździeleńnie. Adtul pavieźli ŭ balnicu. Doktar zafiksavaŭ ślady ad pabojaŭ, stresu. U milicyi nas apytali».

Aktyvistki havorać, što nie majuć kryŭdy na biełarusaŭ. Adnak jany adčuli, nakolki zapałochanyja ludzi ŭ Biełarusi, nakolki jany adčuvajuć nieabaronienymi.

Ina Šaŭčenka zajaviła, što dziaŭčaty nie škadujuć, što pryjechali ŭ Biełaruś,

choć i daviałosia stolki pieražyć.

Pavodle jaje słovaŭ, užo rychtujecca novaja pajezdka ŭ Biełaruś.

«Spadziajemsia, što i biełaruski dałučacca da nas, jany nas padtrymlivajuć, ale bajacca vychodzić», — kaža jana.

8.45

Pakul va ŭkrainskich ŚMI mała paviedamleńniaŭ pra spravu Femen.

Pryčym strymana reahujuć na jaje najpierš dziaržaŭnyja ŚMI. Tak, u stužcy navin ahienctva Ukrinfarm jość tolki paviedamleńnie pra hetuju situacyju sa spasyłkaj na biełaruskaje ahienctva BiełaPAN. Z boku ŭkrainskaha MZS učora ŭviečary zajavaŭ nie było.

Takoje ihnaravańnie moža być palityčnym rašeńniem. Kijeŭ zaviaz u składanych pieramovach z Maskvoj pa hazavym pytańni. I ŭ takoj situacyi nie moža dazvolić sabie jašče adzin zamiežnapalityčny kanflikt. Ułady Ukrainy biaśsilny abaranić svaich hramadzian u dadzienaj situacyi.

Nahadajem, što ŭ aŭtorak znajšlisia aktyvistki epatažnaha ruchu Femen. Jany byli źnikli ŭviečary paniadziełka ŭ Minsku paśla praviadzieńnia svajoj akcyi kala budynku KDB. Dziaŭčaty vyjšli z hłuchohu lesu ŭ Homielskaj vobłaści. Sa słovaŭ žycharoŭ vioski Biaki, kudy jany źviarnulisia, dziaŭčaty byli «źniamožanyja». Aktyvistki Feme śćviardžajuć, što tudy ich vyvieźli nieviadomyja mužčyny ŭ cyvilnym. Pry hetym ich raździeli, bili i ździekavalisia. U pryvatnaści, u ich parezanyja vałasy i hałovy zalityja zialonkaj.

0:49

Alaksandru Niamčynavu, Inu Šaŭčenka i Aksanu Šačko vyvieźli konsulskim aŭto ź Jelskaha RAUSa. Mašyna skiravałasia ŭ bok ukrainskaj miažy, da pamiežnaha pierachodu Novaja Rudnia.

0:46

Supracoŭnik pamiežnaj słužby paviedamiŭ žurnalistu NN, što aktyvistak Femen chutka paviazuć na biełaruska-ŭkrainski pamiežny pierachod Novaja Rudnia. U dvoryk RAUSa zajechała mašyna ŭkrainskaha konsuła.

23:37

Viarnuŭsia konsuł, jaki adjazdžaŭ. Pajšoŭ u RAUS. Žurnalistam nie paviedamiŭ ničoha, tolki kinuŭ frazu: "Zaraz budziem usio vyśviatlać, budziem raźbiracca".

22:30

Jak pieradaje karespandentka NN z-pad muroŭ Jelskaha RAUSa, zaraz dziaŭčaty znachodziacca ŭ adździele milicyi. Unutr nikoha nie puskajuć. Pryjechaŭ na niekatory čas konsuł, svajaki dziaŭčat pieradali kopii pašpartoŭ. Viadziecca raźbiralnictva, čamu jany apynulisia ŭ pamiežnaj zonie biez dakumientaŭ.

Žurnalisty, jakija bačyli, jak dziaŭčat pryvieźli z balnicy, śćviardžajuć, što jany vyhladali stomlenymi i pryhniečanymi: u Iny Šaŭčenki i Aksany Šačko parezanyja vałasy (Alaksandra Niamčynava była i dahetul karotka padstryžana). Tvary zapeckanyja zialonkaj.

U balnicy značnych paškodžańniaŭ u ich nie vyjavili, u asnoŭnym -- hiematomy na rukach i inšych častkach cieła.

U momant, kali milicyja vyvodziła aktyvistak ź lakarni, žurnalistam udałosia zadać niekalki pytańniaŭ dziaŭčatam, dadaje BiełaPAN. Pradstaŭnicy Femen paviedamili, što byli zatrymanyja ŭviečary 19 śniežnia na Uschodnim aŭtavakzale ŭ Minsku.

Ich zatrymlivali šeść mužčyn, jakija nie pradstavilisia, ale adrazu ž nasunuli šapki na vočy aktyvistkam i pavieźli ich u nieviadomym kirunku.

Pa słovach dziaŭčat, u vyniku ich vyvieźli ŭ les, dzie pahražali i ŭsialak ździekavalisia, prymušali raspranacca dahała, ablili hałovy zialonkaj, prymušali trymać płakaty z fašysckaj svastykaj. Usio heta zdymałasia na videakamieru.

Konsuł Ukrainy źjechaŭ, da žurnalistaŭ vyjšaŭ pres-ataše pasolstva Ukrainy Alaksiej Jemialjanienka, jaki skazaŭ, što ź dziaŭčatami usio ŭ paradku, asablivych paškodžańniaŭ u ich niama.

22:22

Pavodle słovaŭ načalnika RAUSa Anatola Jakimca, troje ŭkrainak sapraŭdy znachodziacca ŭ ich. Nijakich kamientaroŭ jon nie daje, kaža, što idzie raźbiralnictva, paviedamili Jeŭraradyjo pa telefonie.

Tym časam žurnalisty ź Minska pryjechali ŭ Jelsk.

Biełaruskija naviny dadajuć, što ciapier aktyvistki Femen prachodziać miedycynski ahlad u Jelskaj rajonnaj balnicy. U balnicy dziažurać supracoŭniki Jelskaha RAUS.

Milicyjaniery patłumačyli, što dziaŭčaty byli znojdzieny ŭ pamiežnaj zonie ŭ vioscy Biaki. U ich nie było dakumientaŭ, tamu jany byli dastaŭleny ŭ adździeł milicyi dla razboru. Tudy ž prybyŭ konsuł Ukrainy, jaki tam čakaje aktyvistak.

Milicyja paviedamiła, što paśla miedahladu dziaŭčaty buduć dastaŭlenyja ŭ adździeł dla dalejšaha razhladu.

Jak ličać milicyjanty, dziaŭčaty, jakija ŭ paniadziełak praviali akcyju kala biełaruskaha KDB, ničoha nie parušyli, bo patłumačyli, što ŭ pamiežnuju zonu trapili nie pa svajoj voli. U dačynieńni da ich byli ździejśnienyja hvałtoŭnyja dziejańni, ich vyvieźli ŭ pamiežnuju zonu i kinuli ŭ lesie.

16:21

Supołka Femen śćviardžaje, što dziaŭčat zatrymali asoby ŭ cyvilnym kala minskaha aŭtavakzała, pryblizna a 19-j hadzinie. U ich adabrali mabilniki, ich źbili i vykinuli biez dakumientaŭ kala vioski Biaki (nacisk na druhi skład) u Jelskim rajonie Homielskaj vobłaści. Heta na samaj miažy z Ukrainaj. Spačatku takaja infarmacyja źjaviłasia ŭ sacyjalnych sietkach ad imia supołki.

Hetuju infarmacyju paćvierdziła «Našaj Nivie» kiraŭnička Femen Hanna Hucał.

Jana śćviardžaje, što

ź dziaŭčat ździekavalisia. Ich ablili alejem, pahražali padpalić ich. Femen-istak usiu noč pravazili ŭ mašynie. Im abrezali vałasy i, narešcie, vykinuli ŭ lesie.

Žychary vioscy Biaki Jelskaha rajona paćvierdzili radyjo "Svaboda", što 20 śniežnia pad viečar ukrainki sapraŭdy pryjšli da ich u viosku. Pa słovach ludziej, jany byli źniamožanyja. Miascovy žychar spadar Juryj daŭ im svoj telefon, kab ukrainki zmahli datelefanavacca da znajomych i paviedamić pra svajo miesca znachodžańnia.

Paśla hetaha miascovy žychar Alaksandr prapanavaŭ im zajści ŭ svaju chatu, kab napaić čajem. Žančyny pahadzilisia.

U Jelskim rajadździele milicyi ŭ 16.45 ničoha nie viedali pra ŭkrainak. Adnak prykładna praz hadzinu pradstaŭnik Skaradnianskaha sielsavieta paviedamiŭ, što ŭ Biaki vyjechała apieratyŭnaja milicejskaja hrupa ź Jelska, kab na miescy vyśvietlić, što zdaryłasia z ukrainskimi hramadziankami.

U intervju ahienctvu BiełaPAN Hucał vykazała mierkavańnie, što heta sprava ruk biełaruskaj dziaržbieśpieki abo milicyi. Dziaŭčaty paviedamili Hucał, što ich vykradalniki zdymali ŭvieś «praces pakarańnia» na kamieru.

Pakul niama mahčymaści paćvierdzić ci abvierhnuć hetuju infarmacyju z krynic, niezaležnych ad Femen.

Ukrainskija ŚMI pakul nie nadajuć zdareńniu vialikaj uvahi.

Načalnik centra infarmacyi i hramadskich suviaziaŭ KDB Alaksandr Antanovič na prośbu BiełaPAN prakamientavać dadzienuju infarmacyju zajaviŭ: «Niama nijakich kamientaroŭ».

Pres-sakratar pasolstva Alaksiej Jemialjanienka paviedamiŭ «Biełsatu», što pakul aficyjnaha paćviardžeńnia hetaj infarmacyi jany nie majuć. «Ciapier vyśviatlajem usie akaličnaści, ci sapraŭdy heta tak. My pracujem. Zrazumiejcie, dapamahčy dziaŭčatam dla nas heta pytańnie №1», — skazaŭ pres-sakratar.

Jon dadaje, što jany źviartalisia pa infarmacyju ŭ biełaruskija KDB i MUS. Adnak, pa słovach Jemialjanienki, tut «jość svaje niuansy pracy». Siłavyja viedamstvy abaviazany adkazać na zapyt ambasady ŭ praciahu dvuch dzion. Hety termin jašče nie vyjšaŭ, adznačaje Jemialjanienka.

Fotazdymkaŭ pakul niama. Mahčyma, žurnalisty zrobiać ich da viečara.

Biełaruś była pieršaj dyktatarskaj krainaj, u jakoj Femen-istki praviali svoj satyryčny pierformans.

Dahetul jany praviali šmatlikija chepieninhi va Ukrainie i inšych pravavych dziaržavach. Temaj ich pratestu była jak žanočaja tematyka, tak i pytańni čałaviečaj hodnaści. pravoŭ asoby. Svaje viadomyja pierformansy jany praviali ŭ Kijevie ŭ časie vizitu Pucina i ŭ Maskvie paśla dumskich vybaraŭ.

Nahadajem, što ŭčora,

19 śniežnia aktyvistki ukrainskaha ruchu Femen — Alaksandra Niamčynava, Ina Šaŭčenka, Aksana Šačko — zładzili akcyju kala ścienaŭ KDB u Minsku. Jany raździelisia i stali z płakatami «Žyvie Biełaruś» i «Svabodu palitviaźniam».

Pry kancy akcyi im udałosia źbiehčy. Byli zatrymanyja apieratar Femen, hramadzianka Aŭstralii Kici Hryn, videaapieratar «Našaj Nivy» Taćciana Haŭrylčyk i fotakarespandent Julija Daraškievič.

Kici Hryn była praź niekalki hadzin adpuščana paśla ŭmiašalnictva pasolstva Aŭstralii ŭ Rasii.

Viečaram suviaź z ukrainskimi dziaŭčatami i Kici Hryn abarvałasia, jany pierastali adkazvać na telefanavańni. Kici Hryn pozna viečaram była departavanaja ŭ Vilniu.

Kiraŭnictva Femen (Hanna Hucał) raspaŭsiudziła zvarot u Internecie z zaklikam usich dobrych ludziej paspryjać pošuku dziaŭčat. Biełaruskaje KDB i milicyja admaŭlali datyčnaść da zatrymańniaŭ.

nn.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH