Ina Šaŭčenka.
Alaksandra Niamčynava.
Aksana Šačko.
Adkazy z pres-kanfierencyi, jakuju dziaŭčaty praviali ŭ Kijevie. Havoryć Alaksandra Niamčynava:
My pravodzili 19 čysła ŭ Biełarusi ŭ Minsku pierad budynkam KDB akcyju. My praviali. Usio było narmalna, nam udałosia syści. Ale my dumajem, što nas adpuścili śviadoma, kab zatrymać paśla, kab presa nie bačyła. My ŭziali kvitok da Homiela, kab dabracca da Branska.
Na aŭtavakzale niedzie bieź piaci siem da nas padyšli nieviadomyja ludzi, šeść čałaviek, uziali nas pad ruki i pasadzili ŭ mašynu. Jany pradstavilisia jak rabotniki Ministerstva ŭnutranych spravaŭ Biełarusi. Dziaŭčat pasadzili ŭ sierabrystuju "Haziel", a mianie ŭ čorny "Mersedes".Mianie katali chvilinaŭ 15-20. Paśla pierasadzili ŭ inšuju mašynu, «Alfa-ramiea» šeraha koleru. Paśla nas abjadnali i niedzie da pałovy na siomuju [ranku] prosta katali pa Minsku. My prasili advieźci nas u RUUS, ale jany skazali, što vy budziecie siadzieć tut stolki, kolki my skažam.
Stavilisia dobra, kupili nam vady navat.
A pałovie na siomuju vyvieźli za horad, naciahnuli šapki na vočy i pieradali nas nieviadomym ludziam.Nam załamali zzadu ruki, prycisnuli hałovy ŭniz. A ruki źviazali takoj płastykavaj štukaj, jakoj truby źviazvajuć. U mianie voś ad jaje ślady.
Jany nas pavieźli ŭ nieviadomym kirunku. Mnoha było pavarotaŭ, prypynkaŭ. jak tolki ty padymaŭ hałavu, adrazu bili pa hałavie.
Jany pradstavilisia pradstaŭnikami RNIE, skazali, što jany ničoha nie bajacca. U ich jość zaviazki ź milicyjantami, va ŭradzie Biełarusi. Jany ŭvieś čas nas abzyvali, kazali, što my pryjechali siudy parušać našaje słavianskaje adzinstva.
Niedzie 3-4 hadziny my jeździli, paśla jany vyvieli nas u les. Skazali — šapki zdymajcie. My ŭbačyli 6-7 mužčynaŭ roznaha ŭzrostu, u šapkach z prarezami dla vačej i rota. Jany nas prymusili raspranucca da pojasa i ŭziać płakaty ŭ ruki.
U mianie było, zdajecca, «Za słavianskaje adzinstva», a ŭ dziaŭčat na płakatach byli svastyki — čornaja i ružovaja.
Paśla jany skazali: a ciapier zdymajcie ŭsio nižej pojasa. My vielmi napałochalisia, bo padumali, što zaraz budzie samaje strašnaje. Ale jany nas vyrašyli pabić. Pabili, paśla my apranulisia, a jany paśla kažuć: «A ciapier nachilajcie hałovy». My nachilili, dziaŭčatam abrezali vałasy, a paśla jašče ablili hałovy zialonkaj.
Paśla iznoŭ kažuć: «Nu što, suki,vy pryjedziecie jašče ŭ Biełaruś?».
Paśla jany iznoŭ prymusili nas raździecca, ablili alejem i absypali pierjem. I ŭsio heta zapisvałasia na kameru.
U nas zabrali ŭsie asabistyja rečy.
Paśla jany 30 chvilinaŭ nas pavazili i vykinuli z mašyny. Tam była rečka. My vielmi napałochalisia, bo bajalisia, što nas utopiać. Ale jany skazali, što voś pojdziecie i pryjdziecie va ŭkrainskaje siało, i kab bolej my vas u Biełarusi nie bačyli.
Pytańnie: Jak vy dumajecie, heta było sapraŭdy RNIE?
Niamčynava: Ja nia viedaju, nie mahu ničoha skazać. Tyja ludzi, što nas pa Minsku vazili, my bačyli ich tvary, jany siabie pa imionach nazyvali — Andrej, Dzima. A tyja druhija byli vielmi dobra padrychtavanyja, tvaraŭ nie pakazvali, ale skazać, chto heta, ja nie mahu.
* * *
RNIE — heta rasijskaja nieanacysckaja arhanizacyja, što ŭźnikła ŭ 1990-ch. Jaje supołki ŭtvarylisia i ŭ Biełarusi. Adnak ich publičnaja dziejnaść skončyłasia na pačatku 2000-ch paśla zabojstva jaje lidara Hleba Samojłava. Ličycca, što svojeasablivym instruktaram u supołcy byŭ Valeryj Ihnatovič — były bajec «Ałmaza», jakoha paśla śmierci Samojłava asudzili za šmatlikija złačynstvy. Pra arhanizacyju padrabiazna pisali na pačatku 2000-ch.
Paet Słavamir Adamovič u 1999-m pranik unutr arhanizacyi, kab zrabić pra jaje publikacyju ŭ «Našaj Nivie». Nieŭzabavie paśla toj publikacyi jaho da kryvi źbili dvoje ŭ padjeździe doma, dzie mieściłasia Redakcyja «NN». Pierad jahonym prychodam na leśvicy bačyli dziŭnaha čałavieka z pałačkaj. Paśla vidavočcy syšlisia, što heta byŭ Ihnatovič.
I ŭ Rasii, i ŭ Biełarusi arhanizacyja spyniła svaju aktyŭnaść u 2000-ch.
Źviestki ab datyčnaści RNIE da vykradańnia aktyvistak Femen źjaŭlajucca pravakacyjaj, paviedamiŭ paźniej usio jašče isny sajt RNIE-Biełaruś.
