13 lutaha na siadzibie Partyi BNF prajšła pres-kanferencyja, na jakoj było abvieščana pra pačatak novaj hramadzianskaj kampanii «Biełaruś – u Radu Eŭropy». Jaje inicyjatarami stali pravaabaronca Ihar Lednik, advakat Ihar Rynkievič, Iryna Kazulina, pradprymalnik Alaksandar Makajeŭ, Viačasłaŭ Siŭčyk, moładzievyja aktyvisty Pavał Krasoŭski, Jury Karetnikaŭ dy Źmicier Chviedaruk.
Ihar Rynkievič na pres-kanferencyi zaznačyŭ, što Biełaruś nie pavinna zastavacca adzinaj krainaj kantynentu, nie pradstaŭlenaj u Radzie Eŭropy. Pakolki, na dumku inicyjataraŭ kampanii, zajavy kiraŭnictva krainy pra liberalizacyju — butaforyja, hramadztva samo musić prajavić inicyjatyvu. Podpisy za 12 prapanovaŭ Eŭraźviazu ŭžo źbirajuć pradprymalniki, i raspačnuć źbirać – moładzievyja aktyvisty. U najbližejšy čas dla demakratyčnaj hramadzkaści budzie pradstaŭleny Memarandum pra biełaruska-eŭrapiejskija stasunki.
Udzielniki pres-kanferencyi taksama zajaŭlali pra padrychtoŭku Zaklučeńnia ab pravavym statusie Łukašenki, jakoje abapirajecca na vysnovy kamisii Viktara Hančara. Dakument budzie prymierkavany da Kanhresu Demsiłaŭ.
Novaja hramadzianskaja kampanija maje try adrasaty. Pieršy – samo biełaruskaje hramadztva, eŭrapiejskija pamknieńni jakoha stanucca vidavočnymi j prajaŭlenymi. Druhi adrasat – Eŭropa, treci adrasat – sama ŭłada.
Pakul inicyjatyva vyhladaje syroju. «My źbiralisia pradstavić kampaniju tolki praz tydzień – kaža I. Rynkievič, – ale śpiašalisia. 13 lutaha PASE razhladaje sytuacyju ŭ Biełarusi, a 14-ha – dzień Śviatoha Valancina i treba abaranić moładź».
Ale, jak kazaŭ saviecki palityčny dziajač, — «praces pajšoŭ».
