Upraŭleńnie departamienta finansavych rasśledavańniaŭ Kamiteta dziaržkantrolu pa Minskaj vobłaści i Minsku raspačało kryminalnuju spravu ŭ dačynieńni da arhanizataraŭ złačynnaj hrupy, jakaja zajmałasia niezakonnaj pradprymalnickaj dziejnaściu z vykarystańniem dakumientaŭ łžepradprymalnickich struktur.
Jak paviedamiła pres-słužba KDK, u skład hetaj hrupy akramia inšych udzielnikaŭ uvachodzili byłyja i dziejnyja słužbovyja asoby adnaho ź miasakambinataŭ Minskaj vobłaści.
Arhanizavanaja złačynnaja hrupa dziejničała z 2009 hoda pa kastryčnik 2011 hoda. Za hety čas jaje ŭdzielniki atrymali niezakonny dachod prykładna 1,3 młrd. rubloŭ.
U svajoj dziejnaści ŭdzielniki złačynnaj hrupy vykarystoŭvali rekvizity, dakumienty i piačatki troch kamiercyjnych pradpryjemstvaŭ, jakija mieli prykmiety łžepradprymalnickich struktur. Praz hetyja firmy ažyćciaŭlałasia pastaŭka roznych tavaraŭ (zapasnyja častki da aŭtamabilaŭ, aŭtamabilnyja šyny, kampjutarnaja technika, nabytyja na rynkach za najaŭny raźlik) na adras adnaho ź miasakambinataŭ Minskaj vobłaści, a ŭ jakaści apłaty za pastaŭlenyja tavary miasakambinat na adras łžestruktur ažyćciaŭlaŭ adhruzku miasapradukcyi. U dalejšym miasnaja pradukcyja vyvodziłasia ź lehalnaha abarotu i pradavałasia na staličnych rynkach, a taksama vyvoziłasia ŭ Rasijskuju Fiederacyju i realizoŭvałasia tam za najaŭny raźlik.
Padčas praviedzienych apieratyŭna-śledčych mierapryjemstvaŭ nakładzieny aryšt na majomaść, jakaja naležyć fihurantam i vykarystoŭvałasia imi ŭ supraćpraŭnaj dziejnaści na ahulnuju sumu nie mienš jak 500 młn. rubloŭ. U dačynieńni da piaciarych udzielnikaŭ złačynnaj hrupy raspačata kryminalnaja sprava pa prykmietach składu złačynstva, praduhledžanaha č. 3 art. 233 KK Respubliki Biełaruś (ažyćciaŭleńnie niezakonnaj pradprymalnickaj dziejnaści ŭ składzie arhanizavanaj złačynnaj hrupy). Dziejnyja i byłyja słužbovyja asoby miasakambinata zatrymanyja.
